लुभेनमा ओपन स्टेजमा उत्रंदै स्थानीय कलाकार

लुभेन । बेल्जियमको लुभेनमा स्थानीय कलाकारहरु एउटै ओपन स्टेजमा उत्रने भएका छन् ।

हाम्रो परिवार नामक संस्थाले आउंदो १९ अगष्ट दिउसो ओपन स्टेज परफर्मेन्ससहित दोश्रो वार्षिक बीबीक्यू पार्टी गर्न लागेको हो ।

परफर्मेन्स गर्न इच्छुकले १५ अगष्टभित्र आफ्नो नाम दर्ता गर्नुपर्ने संस्थाले जनाएको छ ।

च्यारिटी संस्था हाम्रो परिवारका अध्यक्ष सरोज आचार्यले स्थानीय प्रतिभालाई एउटै मञ्च प्रदान गर्ने प्रयास गरिएको बताए । ‘हाम्रो बीबीक्यू पार्टीलाई सांगीतिक माहोल बनाउन र स्थानीय कलाकारलाई अवसर प्रदान गर्न ओपन स्टेज परिकल्पना गरिएको हो’, आचार्यले भने ।

प्रवासमा नेपाली कला संस्कृतिको जगेर्ना एवं युवा र बालबालिकालाई विभिन्न अवसर प्रदान गर्न संस्था क्रियाशील छ ।

बेल्जियममा पद ओगट्ने तर काम नगर्ने अनि समाजलाई विभाजनतर्फ उन्मुख गराउन लागिरहेका केही नेपाली सामाजिक संस्थाको अगाडि हाम्रो परिवारले उदाहरणीय काम गरिरहेको एनआरएनए बेल्जियमकी महासचिव रुबिना शर्माले जनाइन् । उनले हाम्रो परिवारका हरेक कार्यक्रममा साथ दिंदै आएकी छन् ।

उक्त संस्थाले केही साताअघि युवाहरुमाझ फुटबल प्रतियोगिता र गत साता बालबालिकाका लागि फेस पेन्टिङ वर्कसप गरेको थियो ।