स्वास्थ्यमा सुधारपछि ‘आइसियू’बाट बाहिरिए प्रधानमन्त्री जोन्सन

बेलायती प्रधानमन्त्री बोरिस जोन्सन

लण्डन । चार दिनदेखि लण्डनस्थित अस्पतालमा इन्टेसिभ केयर युनिट (आइसियू) मा राखिएका बेलायतका प्रधानमन्त्री बोरिस जोन्सनलाई वार्डमा सारिएको छ ।

उनको स्वास्थ्यमा क्रमिक सुधार आएसंगै ‘आइसियू’ बाट वार्डमा सारिएको प्रधानमन्त्रीको कार्यालयले जानकारी दिएको छ । सोमबार राती ‘आइसियू’ मा लगिएका प्रधानमन्त्रीलाई बिहीबार साँझ वार्डमा फिर्ता ल्याइएको छ ।

गत मार्च २७ मा कोरोना भाइरसको संक्रमण पुष्टी भएका प्रधानमन्त्री जोन्सनलाई लक्षणहरु कायम रहेपछि गत आइतबार लण्डनको सेन्ट थोमस अस्पतालमा भर्ना गरिएको थियो । अवस्था जटिल बनेको भन्दै एक दिनपछि उनलाई ‘आइसियू’मा राखिएको थियो ।

चार दिनसम्म ‘आइसियू’मा राखिएका उनलाई अक्सिजनको सहयोग दिइएपनि ‘भेन्टिलेटर’ मा राखिएको थिएन । उनले कुनै अरु सहयोगबिनै श्वासप्रश्वास पनि गरिरहेका थिए ।

आइसियूबाट बाहिर आएपनि अहिलेको लागि प्रधानमन्त्री चिकित्सकको विशेष निगरानीमा अस्पतालमै रहनेछन् । उनी अझै कति दिन अस्पताल बस्नुपर्ने भन्ने बारे कुनै जानकारी गराइएको छैन् ।