विश्वासको मत नपाएपछि पुष्पकमल दाहाल प्रधानमन्त्रीबाट पदमुक्त

काठमाडौं- प्रधानमन्त्री पुष्पकमल दाहाल ‘प्रचण्ड’ ले प्रतिनिधि सभाबाट विश्वास गुमाएका छन् ।

शुक्रबार बसेको प्रतिनिधिसभा बैठकमा विश्वासको मत नपाएपछि प्रचन्ड प्रधानमन्त्रीबाट पदमुक्त भएका छन् ।

प्रतिनिधिसभा बैठकमा उपस्थित २५८ मध्ये दाहालले लिएको विश्वासको मतको पक्षमा जम्मा ६३ मत र विपक्षमा १९४ मत परेको हो । मत दिन्न भन्नेमा १ मत परेको थियो ।

प्रधानमन्त्री बन्न आवश्यक १३८ मत प्राप्त नभएपछि उनी पदमुक्त भए ।

यसअघि आलोपालो कांग्रेस र एमालेको समर्थनमा चार पटकसम्म विश्वासको मत प्राप्त गर्न सफल दाहाल यसपटक भने असफल भएका हुन् । 

प्रधानमन्त्री प्रचण्डले नेपालको संविधानको धारा १०० को उपधारा (२) बमोजिम विश्वासको मतको प्रस्ताव राखेका थिए ।