यूके आमनिर्वाचनः एक्जिट पोलमा लेबरलाई ४१० सिट

लन्डन– बेलायतमा बिहीबार राती १० बजे मतदान सकिएसंगै एक्जिट पोलको नतिजा सार्वजनिक भएका छन् । १४ वर्षको कन्जरभेटिभ शासन अन्त्य गर्दै आम चुनावमा लेबरले भारी जित हासिल गरेको एक्जिट पोलले देखाएको छ ।

बीबीसी, स्काइ न्यूज र आइटिभी न्यूजका लागि इप्सोस यूकेले गरेको एक्जिट पोलमा प्रतिपक्षी लेबरले ४१० सिट ल्याउने प्रक्षेपण गरेको छ ।

सत्तारुढ कन्जरभेटिभले जम्मा १३१ सिट ल्याउने प्रक्षेपण पोलको छ । सन् २०१९ को आमनिर्वाचनमा कन्जरभेटिभले ३६५ सिट ल्याएको थियो ।

एक्जिट पोलका अनुसार लिब्डेमले ६१, रिफर्म यूकेले १३ सिट, स्कटिश नेशनल पार्टीले १०, प्लेड क्यामरुले ४, ग्रीनले २ र अन्यले १९ सिट ल्याउने प्रक्षेपण गरिएको छ ।

यस निर्वाचनमा बेलायतभरका कुल ६ सय ५० निर्वाचन क्षेत्रबाट प्रतिनिधित्व गर्ने सांसदहरु निर्वाचित हुनेछन् ।

बेलायती संसद हाउस अफ कमन्समा वहुमतको सरकार बनाउन ३२६ सिट आवश्यक पर्छ ।

यो पनि पढौं: यूके आमनिर्वाचन: लेबर १४ वर्षपछि सत्तामा फर्किने अपेक्षा