लामाको निधनले नेपाली जन सम्पर्क समिति बेलायत मर्माहत
![](https://www.nepalilink.com/wp-content/uploads/2024/02/horizontal.gif)
![](https://www.nepalilink.com/wp-content/uploads/2020/04/anugraha_810.gif)
लण्डन– बेलायतको नेपाली समुदायका एक अग्रज अभियन्ता आङ कलजंग लामाको असामयिक निधनप्रति नेपाली जन सम्पर्क समिति बेलायतले शोक व्यक्त गरेको छ ।
समितिका कार्यकारी सभापति महेश कुमार दाहालले एक वक्तव्य जारी गर्दै लामाको निधनले आफू, सिंगो कार्यसमिति र काँग्रेसी कार्यकर्ता मर्माहत भएको जनाएका छन् ।
दाहालले स्वर्गीय लामाको चीर शान्तिको कामना गर्दै शोक सन्तप्त परिवारजनमा धैर्यधारण गर्ने शक्ति मिलोस् भन्दै भगवानसँग प्रार्थना पनि गरेका छन् ।
‘हाम्रो राजनीतिक आस्था फरक थियो तर उहांसँग लोकतान्त्रिक आन्दोलन र नेपाली समाजको हितका सवालमा सधैं सहकार्य र सामिप्यता रह्यो’ दाहालले भनेका छन् ’बेलायतको नेपाली समुदायले एक होनहार योद्धा गुमाएको छ । ‘
प्रवासी नेपाली मञ्च (तत्कालिन नेपाली लोकतान्त्रिक मञ्च) यूकेका संस्थापक अध्यक्ष ५७ वर्षीय लामाको मंगलबार काठमाडौंमा निधन भएको हो ।
काठमाडौं बौद्धमा मर्निङ वाकमा निस्किएका बेला ढलेर बेहोस भएका लामालाई अस्पताल पुर्याउँदा चिकित्सकले मृत घोषित गरेको पारिवारिक स्रोतले उल्लेख गरेको छ ।
एनआरएनए यूकेका पूर्व उपाध्यक्ष एवं संस्थापक सदस्य स्वर्गीय लामा प्रवासी नेपाली मञ्च अन्तरराष्ट्रिय कमिटीको सल्लाहकार परिषदका वर्तमान सदस्य थिए ।
केही समयदेखि नेपालमा रहेर प्रपर्टी व्यवसायमा सक्रिय उनी विगत तीन महिनादेखि नेपालमै थिए ।
स्वर्गीग लामा तीन दशकभन्दा अघि बेलायत आइसकेका यहाँको नेपाली समुदायका एक अग्रज हुन् । उनका श्रीमती र दुई छोरा बेलायतमै बस्दै आएका छन् ।