च्यारिटी लाइभ कन्सर्टका लागि बेलायत उडिन् आनी

काठमाडौँ, १० बैशाख —मानवसेवा आश्रम सहयोगार्थ लोकप्रिय गायिका तथा समाजसेवी आनी छोइङ ड्रोल्माको लाइभ कन्सर्ट बेलायतमा आयोजना हुँदैछ ।

यही ५ मे (वैशाख २३ गते) बेलायतको क्याम्बर्लीस्थित लेकसाइड कन्ट्री क्लबको हलमा आयोजना हुने कन्सर्टका लागि गायिका आनी छोइङ र मानवसेवा आश्रमका संस्थापक एवम् केन्द्रीय अध्यक्ष रामजी अधिकारी आज त्यसतर्फ प्रस्थान गरेका छन् ।

मानवसेवा आश्रम यूके च्याप्टरको आयोजनामा बेलायतमा मे ५ मा कन्सर्ट र मे १९ सम्म मानवता प्रवर्द्धनसम्बन्धी विभिन्न रचनात्मक कार्यक्रमहरू आयोजना हुने आयोजक संस्थाका अध्यक्ष अधिकारीले जानकारी दिए । 

विगतमा पनि आश्रमद्वारा बेलायतमा आमा सेमिनारलगायत मानवता प्रवर्द्धनसम्बन्धी कार्यक्रम सम्पन्न भइसकेका अधिकारीको भनाइ छ । यसपटक हुनलागेको कन्सर्ट मानवसेवा आश्रमको बेलायतमा तेस्रो कार्यक्रम हो ।

‘इनर मेलोडी फर इनर पिस’ कन्सर्टमा सहभागी हुन मानिसहरुको आकर्षण बढ्दै गएको मानवसेवा आश्रम यूके च्याप्टरका पदाधिकारीहरुले जानकारी दिएका छन् । कन्सर्ट कार्यक्रममा एक हजार जनालाई सहभागी गराउने आयोजकको लक्ष्य रहेको मानवसेवा आश्रम यूके च्याप्टरका सचिव यादव श्रेष्ठले बताए ।

कन्सर्ट र मानवता प्रवर्द्धनसम्बन्धी विभिन्न रचनात्मक कार्यक्रमबाट संकलन गरिने रकम घरबार र परिवारविहीनहरूको आश्रयस्थल मानवसेवा आश्रमको सेवाप्रवाह सहजीकरणमा खर्चिने मानवसेवा आश्रमका प्रमुख संस्थापक एवं केन्द्रीय अध्यक्ष अधिकारीले बताए । कन्सर्टबाट एक लाख पाउन्डभन्दा बढी सहयोग जुटाउने लक्ष्य राखिएको छ ।

बुद्ध फाउन्डेसन यूके, बुद्धिस्ट गुम्बा रिडिङ यूके, द बुद्धिस्ट कम्युनिटी सेन्टर यूके, शिव कल्चर एण्ड कम्युनिटी सेन्टर यूके, तमुधिं एसोसिएसन यूके, पासा पुच गुठी युके, क्षेत्री समाज यूके, क्याट यूके, ग्रेटर रिडिङ नेप्लिज कम्युनिटी यूके, नेपाली भिलेज, पोखरेली मञ्च यूके र मगर एसोसिएसन यूके कार्यक्रमको सहआयोजक छन् ।

बेलायतमा गुञ्जयमान हुने कन्सर्ट नितान्त नेपालको सडक पेटी र सार्वजनिक स्थलहरुमा कष्टपूर्ण जीवन बिताउन विवश बेसहारा, असहाय, अशक्त, अभिभावकविहीन, मानसिक तथा शारीरिकरुपमा अति कमजोर मानवहरुको उद्धार, उपचार, पालनपोषण र संरक्षणका लागि सहयोग पुर्‍याउने मनसायले आयोजना गर्न लागिएको मानवसेवा आश्रम यूके च्याप्टरका संयोजक सुनिलबाबु खड्काको तर्क छ ।

संसारभरका मानिसलाई संगीतको आनन्द दिएर कमाएको पारिश्रमिक आनी छोइङले सामाजिक सेवा, परोपकार र धार्मिक कार्यमा खर्चिदै आएकी छन् । 

गत वर्ष आनी छोइङ ड्रोल्मा फाउन्डेसनको आर्थिक सहयोगमा मानवसेवा आश्रमले सहयोगापेक्षीहरूको डेढ महिने राष्ट्रिय उद्धार यात्रा आयोजना गरी तीन सय ४ जनाको उद्धार गरेको थियो । बेलायत यात्राले नेपाललाई सहयोगापेक्षी सडकआश्रित मानवमुक्त राष्ट्र निर्माणमा टेवा पुर्‍याउने आयोजकको विश्वास छ ।

मानवीय कार्यमा सहकार्य गर्न आगामी जेठ ६ गतेसम्म बेलायतका विभिन्न सहरमा मानवता प्रवर्द्धनलगायत ‘मिट एण्ड ग्रिट’ कार्यक्रम गरिने र कार्यक्रममा बेलायतवासी नेपालीलाई सहभागी हुन र सहकार्य गर्न आह्वान गरिएको यूके च्याप्टरका संयोजक राजु आचार्य र विक्रम भट्टराईले बताए ।