लन्डन फेल्थाममा राष्ट्रिय कलाकारका साथ नेपाली नयां वर्ष मनाइयो

लन्डन– नेप्लिज अलायन्स एसोसिएसन (एनएए) यूकेले नेपाली नयाँ वर्ष २०८१ को अवसरमा लन्डनमा एक शुभकामना आदानप्रदान कार्यक्रम गरेको छ ।

गत १३ अप्रिल शनिबार लन्डनस्थित फेल्थाम एसेम्बली हलमा झण्डै ३५० नेपालीको उपस्थितिमा कार्यक्रम भएको हो ।

उक्त कार्यक्रममा बेलायतका लागि नेपाली राजदूत ज्ञानचन्द्र आचार्य, सांसद सीमा मलहोत्रा, हन्स्लो काउन्सिल लिडर काउन्सिलर शान्तनु रजावत, एनआरएनए यूके अध्यक्ष प्रेम गाहामगर लगायत अतिथीहरुले नयां वर्षको शुभकामना दिए ।

कार्यक्रममा लन्डन बरो अफ हन्स्लो काउन्सिलरहरु प्रितम ग्रेवाल, अजमेर ग्रेवाल, शिवराज ग्रेवाल, जुन मिय, समिया चौधरीसहित नेपाली समुदायका लिडरहरु सहभागी थिए ।

आयोजकका तर्फबाट अलायन्स ट्रष्टी एवं लन्डन बरो हन्स्लो पूर्व मेयर तथा काउन्सिलर विष्णु गुरुङले सबै सहयोगीप्रति धन्यवाद व्यक्त गरे । उनले नेपाली कला-संस्कृति र परम्परा जगेर्ना गर्ने उद्देश्यले एसोसिएसन स्थापना गरिएको प्रष्टयाउंदै भविष्यमा पनि यस्ता कार्यक्रम र च्यारिटी कार्यलाई निरन्तरता दिइने बताए ।

अलायन्समा काउन्सिलर विष्णु गुरुङ, सबु सेन्चुरी, हर्क गुरुङ र दिल घले गरि चारजना ट्रष्टी छन् । उनीहरुकै आयोजनामा कार्यक्रम भएको हो ।

दोश्रो चरणको सांस्कृतिक कार्यक्रममा नेपालबाट आएका कलाकारहरु निर्जला गुरुङ र सविन गुरुङ एवं बेलायतका गायक/डिजे सपन राईले सांगीतिक प्रस्तुति दिएका थिए ।

अलायन्सकी ट्रष्टी सबु सेन्चुरीले ‘फूलको आंखामा फूलै संसार…’ बोलको गीत गाएकी थिइन् भने मन्जु शाहले नेपाली मौलिक गीतमा नृत्य देखाइन् । डिजे सपन राईले अबेरसम्म प्रस्तुत गरेको विभिन्न गीत संगीतमा सहभागीहरु मज्जाले नाचेका थिए । कार्यक्रममा कलाकारहरुलाई प्रमाणपत्र समेत प्रदान गरियो ।

सो अवसरमा अलायन्सले ब्रिटिस सेनामा काम गरेका अवकास प्राप्त सैनिकहरुका लागि ‘एचएम आर्म्ड फोर्सेस भेट्रान कार्ड’ आवेदन फाराम समेत वितरण गरि सहयोग गरेको थियो ।

अलायन्समा काउन्सिलर विष्णु गुरुङ, सबु सेन्चुरी, हर्क गुरुङ र दिल घले गरि चारजना ट्रष्टी छन्