१३ वर्षीया बालिकालाई यौनकर्ममा लगाउने खाजाघर सञ्चालक पक्राउ

काठमाडौं । नेपाल प्रहरीले नाबालिकालाई यौनकर्ममा लगाउने खाजाघर सञ्चालकलाई पक्राउ गरेको छ।

प्रहरीको मानव बेचबिखन अनुसन्धान ब्युरोले काठमाडौं महानगरपालिका–१६ बालाजुस्थित ‘लाफा’ नामक खाजा घरमा १३ वर्षीया बालिकालाई यौनकर्ममा लगाउने उदयपुरका २३ वर्षीय नवीनकुमार मगरलाई पक्राउ गरी आज सार्वजनिक गरेको हो।

ब्यूरोका प्रहरी उपरीक्षक ज्ञानेन्द्र प्रसाद फुयालले बालिकालाई यौनकर्ममा लगाउने प्रयोजनका लागि फागुनदेखि डर र प्रलोभनमा पारेर यौनकर्ममा लगाउने गरेको खुलेको जानकारी दिए।

‘खाजा घरमा डरमा पारी राखेको अवस्थामा बालिकालाई उद्धार गरेर मगरलाई पक्राउ गरेका हौं,’ उनले भने।

प्रहरीले पक्राउ मगरलाई मानव बेचबिखन तथा ओसारपसार मुद्दामा काठमाडौं जिल्ला अदालतबाट पाँच दिनको म्याद थप गरी अनुसन्धान गरिरहेको प्रहरी उपरीक्षक फुयालले बताए।