बेलायतमा सम्मानित भए गायक तथा पूर्वधावक लामा

लण्डन- पूर्वधावक, गायक तथा गीतकार बुद्धवीर लामा बेलायतमा सम्मानित भएका छन् ।

इलाम समाज बेलायतले नेपाली खेलकुद र सांगीतिक क्षेत्रमा पुर्‍याएको योगदानको कदर गर्दै उनलाई अल्डरसटमा नगदसहित सम्मान गरेको हो । 

समाजका अध्यक्ष टेकवीर राईले लामालाई ४ हजार ४ सय ७ पाउन्ड (७ लाख ३५ हजार ३ सय ५२ रुपैयाँ) सहित प्रशंसापत्र प्रदान गरेका थिए ।

अल्डरसटमा लामाकै नाममा भएको बुद्धवीर लामा गीतिमय साँझबाट संकलित रकममध्ये बचेको रकम सम्मानस्वरुप प्रदान गरिएको हो । बेलायतमा लामाको यो पहिलो गीतिमय साँझ हो । 

लामाले सम्मानवापत प्राप्त रकम नेपालका दुर्गम क्षेत्रका खेलाडीलाई सहयोग गर्ने र केही रकम अनाथलय, वृद्धाश्रम र अपाङ केन्द्रलाई सहयोग गर्ने बताए । 

यसअघि उनले जुम्लाका धावकलाई टीसर्ट र खेल सामग्री सहयोग गरेका थिए ।

लामाले ताइवान र जापानमा सम्पन्न एसियाली भेट्रान्स एथलेटिक्स च्याम्पियनसीपको ५ हजार मिटर दौडमा क्रमशः छैटौं र दसौं स्थान हासिल गरेका थिए । १० औँ संस्करण अमेरिकामा भएको थियो भने बाँकी नेपालमै भएको थियो ।