गोर्खा वार्ता सफल पार्न बेलायत र नेपाल सरकारसमक्ष गेसोको अपिल

लन्डन। भूतपूर्व गोर्खा मुद्धामा यही बुधबार लण्डनमा हुन लागेको वार्ता सकारात्मक निष्कर्षमा पुग्ने विश्वास भूतपूर्व गोर्खा सैनिक संघ (गेसो) ले व्यक्त गरेको छ ।

गेसो सभापति कृष्णकुमार राईले मंगलबार एक वक्तव्य जारी गर्दै भूतपूर्व गोर्खा प्रतिनिधिसमेतको सहभागितामा बेलायत र नेपालबीच सरकार स्तरमा हुने वार्ता सफल बन्ने आशा व्यक्त गरेका छन् ।  

सभापति राईले यो त्रिपक्षीय वार्ता लामो समयदेखि गोर्खाहरुमाथि हुंदै आएको विभेद अन्त्य गर्ने अवसर रहेको भन्दै सदुपयोग गर्न दुवै सरकारलाई आग्रह पनि गरेका छन् ।  

वार्ताको सफलताले अन्तराष्ट्रिय स्तरमा दुवै राष्ट्रको छवि उचो पार्न मद्धत पुर्‍याउने उनको भनाइ छ।

वार्तामा नेपाल सरकारका तर्फबाट राजदूत ज्ञानचन्द्र आचार्य र बेलायत सरकारको नेतृत्व रक्षा राज्यमन्त्री एन्ड्रयू मरिसनले गर्नेछन् ।

भूतपूर्व गोर्खाहरुको प्रतिनिधित्व गर्दै गोर्खा सत्याग्रह संयुक्त संघर्ष समितिका प्रमुख संयोजक कृष्णबहादुर राई, गेसो उपसभापति धर्म तामाङ र मेजर (रि.) जुदबहादुर गुरुङ सहभागी हुने निर्णय भएको छ ।