भारतलाई घरेलु मैदानमा हराउँदै अष्ट्रेलियाले जित्यो क्रिकेट विश्वकप

लन्डन। यस वर्षको विश्वकप क्रिकेटको सबैभन्दा बलियो दाबेदार भारतलाई उसको घरेलु मैदानमै हराउँदै अष्ट्रेलिया एक दिवसीय क्रिकेटको विश्व च्याम्पियन बनेको छ ।

आइतबार अहमदावादको नरेन्द्र मोदी स्टेडियममा सम्पन्न फाइनलमा भारतलाई ६ विकेटले पराजित गर्दै अष्ट्रेलियाले छैठौँपटक एक दिवसीय विश्वकप जितेको हो।

भारतले दिएको २४१ रनको लक्ष्य अष्ट्रेलियाले ४३ ओभरमा ४ विकेट गुमाएर पूरा गर्यो । अष्ट्रेलियाका लागि प्रारम्भिक ब्याट्सम्यान ट्राभिस हेडले १३७ रन बनाए । मार्कस लाबुसचाग्नीले अविजित ५८ रन जोडे। यी दुईबीच चौँथो विकेटका लागि १९५ रनको साझेदारी भयो ।

त्यसअघि अष्ट्रेलिया ४७ रनमा तीन विकेट गुमाएर दबाबमा आएको थियो । डेभिड वार्नर ७, स्टिभन स्मिथ ४ र मिचेल मार्स १५ रन बनाएर आउट भए । भारतका जसप्रित बुमराहले २ र मोहम्मद सामीले एक विकेट लिएका थिए ।

अष्ट्रेलियाले टस जितेर पहिला भारतलाई ब्याटिङ गर्ने जिम्मा दिएको थियो । भारतले निर्धारित ५० ओभरमा सबै विकेट गुमाएर २४० रन जोड्यो ।

भारतका लागि केएल राहुलले ६६ र विराट कोहलीले ५४ रन बनाएका थिए । हरेक चार वर्षमा आयोजना हुने एक दिवसीय विश्वकप अष्ट्रेलियाले यसअघि सन् १९८७, १९९९, २००३, २००७ र २०१५ मा जितेको थियो ।