भूकम्प अपडेट: १५७ जनाको मृत्यु, १९७ घाइते
![](https://www.nepalilink.com/wp-content/uploads/2024/02/horizontal.gif)
![](https://www.nepalilink.com/wp-content/uploads/2020/04/anugraha_810.gif)
![](https://www.nepalilink.com/wp-content/uploads/2023/11/SA_Surkhet-154127-scaled.jpg)
जाजरकोटमा रामीडाँडा केन् बिन्दु बनाएर शुक्रबार राति आएको भूकम्पले भेरी नगरपालिका३ ठाँटीबजारमा भत्किएका घर । तस्बिर- सुरेश आचार्य/रासस
काठमाडौँ, १८ कात्तिक– भूकम्पका कारण जाजरकोट र रुकुम पश्चिममा गरी हालसम्म एक सय ५७ जनाको मृत्यु भएको छ । भूकम्पबाट हालसम्म दुवै जिल्लामा गरी एक सय ९७ जना घाइते भएका छन् ।
सशस्त्र प्रहरी बल केन्द्रीय कार्यालयका प्रहरी नायव उपरीक्षक शैलेन्द्र थापाका अनुसार भूकम्पका कारण जाजरकोटमा एक सय ५ जनाको तथा रुकुम पश्चिममा ५२ जनाको मृत्यु भएको छ ।
यसैगरी भूकम्पबाट जाजरकोटमा एक सय ५, रुकुम पश्चिममा ८५, दैलेख र बैतडीमा तीन-तीन तथा रोल्पामा एक जना घाइते भएका छन् । घाइतेलाई उपचारका लागि नेपाली सेनाको हेलिकप्टरबाट नेपालगञ्ज, काठमाडौँ तथा अन्य ठाउँमा ल्याउने क्रम जारी छ ।
नेपाली सेना, नेपाल प्रहरी र सशस्त्र प्रहरी बल भूकम्प प्रभावितको उद्धार तथा राहतमा जुटेको छ । प्रभावित क्षेत्रमा यसका लागि एक हजार पाँच सयभन्दा बढी सुरक्षाकर्मी परिचालन गरिएको छ । भूकम्प प्रभावित क्षेत्रमा नेपाली सेनाले उद्धार तथा राहतका लागि पाँचवटा हेलिकप्टर तथा जहाजको प्रयोग गरिएको नेपाली सेनाका प्रवक्ता सहायक रथी कृष्णप्रसाद भण्डारीले जानकारी दिए ।
गए राति ११ः४७ बजे जाजरकोटको बारेकोट गाउँपालिका–१, रामीडाँडा केन्द्र विन्दु भइ ६ दशमलव ४ रेक्टरस्केलको भूकम्प गएको थियो । भूकम्पबाट जाजरकोट र रुकुम पश्चिममा ठूलो धनजनको क्षति भएको छ ।
तस्विरहरु- रासस
![](https://www.nepalilink.com/wp-content/uploads/2023/11/SA-Surkhet-20231104_163853.jpg)
जाजरकोटमा रामीडाँडा केन्द्रबिन्दु बनाएर शुक्रबार राति गएको भूकम्पमा परी घाइते भएकाहरुको जाजरकोट जिल्ला अस्पतालमा उपचार गरिँदै
![](https://www.nepalilink.com/wp-content/uploads/2023/11/SA-Surkhet-20231104_190815.jpg)
जाजरकोट सदरमुकाम खलङ्गा बजारमा भूकम्पको डरले सडकमै बसेका स्थानीय
![](https://www.nepalilink.com/wp-content/uploads/2023/11/RG-Janaki-IMG-20231104-WA0034.jpg)
जाजरकोटमा रामीडाँडा केन्द्रबिन्दु बनाएर शुक्रबार राति गएको भूकम्प प्रभावित क्षेत्रमा पठाउनका लागि तयारी अवस्थामा राखिएको खाद्य सामाग्री