डा. बद्री केसीको परिणाम प्रतिस्पर्धीले मानेनन्, निर्वाचन प्रक्रिया स्थगित
![](https://www.nepalilink.com/wp-content/uploads/2024/02/horizontal.gif)
![](https://www.nepalilink.com/wp-content/uploads/2020/04/anugraha_810.gif)
काठमाडौँ, ३ कात्तिक– गैरआवासीय नेपाली सङ्घ (एनआरएनए)को अध्यक्षमा डा. बद्री केसी निर्वाचित भए लगत्तै उत्पन्न भएको विवादले निर्वाचन प्रक्रिया स्थगित भएको छ ।
अध्यक्षमा केसी निर्वाचित भएको परिणाम बिहीबार राती घोषणा भएपछि उनका प्रतिस्पर्धीद्वय महेश श्रेष्ठ र आर के शर्माले धाँधली भएको भन्दै उक्त मतपरिणाम अस्वीकार गरेपछि निर्वाचन प्रक्रिया अर्को सूचना जारी नभएसम्मका लागि स्थगित गरिएको हो ।
उनीहरुले आज विज्ञप्ति प्रकाशन गरी अध्यक्ष पदको परिणाम स्वीकार गर्न नसकिने बताएका छन् ।
“प्रविधिको प्रयोग गरी एनआरएनएको इतिहासमै पहिलो पटक गराइएको निर्वाचन स्वतन्त्र, निष्पक्ष र धाँधलीरहित हुने हामीले अपेक्षा गरेका थियौँ, तर पूर्वनियोजित रुपमा सेटिङ गरी गरिएको कथित नतिजा घोषणा हामीलाई मान्य छैन”, अध्यक्षका प्रत्यासी श्रेष्ठ र शर्माद्वारा जारी विज्ञप्तिमा भनिएको छ ।
उपाध्यक्ष पदका उम्मेदवार डा केशव पौडेलको मत शून्य देखाइएको भन्दै नतिजा अस्वीकार गरिएको हो । अष्ट्रेलियामा रहेको कम्पनी ‘भेरो’ को अनलाइन प्रणाली ह्याक गरी धाँधली गरेको अध्यक्षका दुई प्रत्यासीको आरोप छ ।
अध्यक्षमा निर्वाचित केसीले एक हजार तीन सय ७८ मत प्राप्त गरेका छन् । साथै अध्यक्षका प्रत्यासी आर के शर्माले एक हजार दुई सय ८१ र महेश श्रेष्ठले एक हजार दुई सय २५ मत प्राप्त गरेको घोषणा निर्वाचन समितिले गरेको थियो ।
सङ्घको उपाध्यक्षमा राज रेग्मी, विनोद श्रेष्ठ, हेमराज शर्मा, रोविन शेरचन, रामशरण सिंखडा, खगेन्द्र न्यौपाने निर्वाचित भएका छन् भने महासचिवमा गौरीराज जोशी, उपमहासचिवमा सोम सापकोटा र प्रवीण गुरुङ निर्वाचित भए ।