पाकिस्तानका पूर्वप्रधानमन्त्री खान रिहाइपछि घर फिर्ता

पाकिस्तानी पूर्व प्रधानमन्त्री इमरान खान १२ मे शुक्रबार इस्लामाबादस्थित उच्च अदालतमा । तस्बिर- एएफपी

लाहोर, ३० वैशाख –पाकिस्तानका पूर्वप्रधानमन्त्री इमरान खान आफ्ना समर्थक र सुरक्षा बलबीच केही दिनदेखि जारी झडपलाई ‘गैरकानुनी’ घोषित गरेपछि शनिबार रिहाईपछि घर फर्किएका छन् ।

गत वर्षको अप्रिलमा सत्ताबाट हटाइए यता दर्जनौं कानुनी मुद्दामा मुछिएका एक समयका सुप्रसिद्ध क्रिकेटरसमेत रहेका पूर्व प्रधानमन्त्री खानलाई जमानतमा रिहा गरिएको हो ।

उनको पक्राउपछि आक्रोशित समर्थकहरूले सरकारी भवनहरूमा आगजनी गरेका थिए भने सडकहरू अवरुद्ध गरेका थिए । उनीहरूले सेनाको सम्पत्तिमा समेत क्षति पुरयाएका थिए ।

रिहा भएपछि इस्लामाबाद उच्च अदालतबाट खानले एएफपीसँग भने, “देशको सबैभन्दा ठूलो पार्टीका प्रमुखलाई षड्यन्त्रपूर्वक अपहरण गरिएको थियो । उच्च अदालतबाट अपहरण गरिएको थियो र सिङ्गो राष्ट्रको सामुन्ने अपहरण गरिएको थियो ।”

पक्राउपछिको प्रदर्शनबारे स्पष्टिकरण दिँदै उनले भने, “उनीहरूले मलाई आतंकवादीजस्तो व्यवहार गरे, यसको प्रतिक्रिया हुनुपर्दथ्यो ।”

गत अप्रिलमा अविश्वासको प्रस्तावमा सत्ताबाट हटेपछि खान सरकार र सरकारी सुरक्षा निकायविरूद्ध पटक–पटक आन्दोलित भएका छन् ।

यसअघि, सरकारको गठबन्धनका प्रमुख तथा प्रधानमन्त्री शहबाज सरिफले हिंसालाई ‘सहयोग गर्ने, उक्साउने र भड्काउने’ कार्यमा संलग्नलाई ७२ घण्टाभित्र पक्राउ गर्नुपर्ने चेतावनी दिएका थिए ।

लाहोर भ्रमणका क्रममा उनले भने, “राज्यविरोधी व्यवहार प्रदर्शन गर्नेलाई पक्राउ गरी आतङ्कवाद विरोधी अदालतमा मुद्दा चलाइनेछ ।”

खानका एक वकिलका अनुसार प्रदर्शन सुरु भएयता पीटीआईका वरिष्ठ नेतृत्वमा भएको आन्दोलनका क्रममा कम्तीमा १० जनाको मृत्यु भएको छ भने सयौँको सङ्ख्यामा पक्राउ गरिएको छ ।

गृहमन्त्री राना सनाउल्लाले निकै लोकप्रिय रहेका खानलाई शरद ऋतुमा हुने चुनावअघि प्रहरीले पुनः पक्राउ गर्ने बताउँदै आएका छन् ।