टीकापुर सरोकार समूहद्वारा उत्कृष्ट पाठक पुरस्कार

टीकापुर- टीकापुर सरोकार समूहले कैलालीको टीकापुर क्षेत्रमा पठन संस्कृतिको प्रवर्धन गर्ने उद्देश्यले टीकापुर सामुदायिक पुस्तकालयमा आएर अध्ययन गर्ने महिनाभरिका एक उत्कृष्ट पाठकलाई दश हजार रुपैयाँ नगद पुरस्कारसहित सम्मान कार्यक्रम सुरु गरेको छ ।

आज टीकापुर सामुदायिक पुस्तकालयमा आयोजित एक  कार्यक्रममा टीकापुर पोलिटेक्निक इन्सिट्युटका उपेन्द्र चौधरीलाई मंसिर २०७९ का लागि उत्कृष्ट पाठकको रु दशहजार नगदसहित सम्मान पत्र प्रदान गरिएको छ ।

पुरस्कृत चौधरीलाई टीकापुर नगरपालिका- १ का अध्यक्ष मोहन बिक र वरिष्ठ शिक्षाविद यज्ञमुर्ति अर्यालले संयुक्त रुपमा पुरस्कार हस्तान्तरण गरे ।

कार्यक्रममा टीकापुर सामुदायिक पुस्तकालयका अध्यक्ष ताराप्रसाद जोशी र टीकापुर सरोकार समूहका सचिव नवराज भट्टराईले पुरस्कारको औचित्यमाथि धारणा प्रस्तुत गरे ।

सरोकार समूहका सचिव नवराज भट्टराईका अनुसार पुस्तकालय र समूहको सहकार्यमा आगामी एक वर्षसम्म प्रत्येक महिना यो पुरस्कार प्रदान गरिनेछ ।

मंसिर २०७९ को पुरस्कार नेपाल अफ्रिका साहित्य समाजले प्रायोजन गरेको थियो ।