लन्डन बन्यो नेपालमय, नेपाली मेला हेर्न हजारौं

तस्विर एज्रा श्रेष्ठ

लन्डन । लन्डनको केम्पटन पार्क रेसकोर्स आइतबार नेपालमय बन्यो । १३ औं नेपाली मेलामा बेलायतका झण्डै तीन दर्जन जातीय तथा सामाजिक संघसंस्थाले आफ्नो मौलिक कला संस्कृति, भेषभूषा, रहनसहन र परम्परा उजागर गरे । मेलाको नारा ‘हाम्रो संस्कृति, हाम्रो पहिचान, हाम्रो गौरव’ थियो ।

आयोजक तमुधिं यूके भएपनि मेलामा सबै जातजातीको प्रतिनिधित्व देखिन्थ्यो । प्रमुख अतिथी राजदूत ज्ञानचन्द्र आचार्यले बेलायतमा अर्को ‘सिंगो नेपाल’ झल्किएको उल्लेख गरे ।
नेपालको विविधता झल्कने गरि ठूलो महोत्सव गरेकामा आयोजकलाई धन्यवाद दिंदै राजदूतले नेपालबाट निकै टाढा रहेपनि आफ्नो कला संस्कृति, परम्परा, भेषभूषा र भाषा जीवन्त बनाउन मेलाले महत्वपूर्ण भूमिका निर्वाह गरेको बताए । दूतावासले समेत मेलालाई सहयोग गरेको थियो ।

आयोजक तमुधिं यूके अध्यक्ष हितकाजी गुरुङले सन् २००९ देखि शुरु नेपाली मेला सबैको साझा मेला बनेको उल्लेख गरे । आर्थिक चुनौतिबीच सबैको साथ सहयोगले मेला सफल भएको उनले सुनाए ।

तमुधिं यूके महासचिव परशुराम गुरुङले सञ्चालन गरेको औपचारिक कार्यक्रममा मेला संयोजक एवं तमुधिं यूके उपाध्यक्ष हरि गुरुङले मेलाको उद्देश्यबारे प्रकाश पारे ।

नेपाली संस्कार संस्कृतिको जगेर्ना, नयां पुस्तालाई मेलामार्फत कुलतमा नलाग्न प्रेरित गर्ने, स्थानीय समुदायसंग मित्रता बढाउने र अन्तरघुलन गर्ने मेलाको प्रमुख उद्देश्य रहेको उनले सुनाए ।

एम्बासडर कप घान्द्रुक समाज यूकेलाई

मेलामा प्रस्तुत सांस्कृतिक झांकी र नृत्यहरुमध्ये सर्वोत्कृष्ट बन्दै यस वर्षको एम्बासडर कप घान्द्रुक समाज यूकेले जित्यो । गत वर्षको विजेता सिक्लेस पार्चे समाज यूके दोस्रो र तमु समाज यूके तेस्रो स्थान प्राप्त गर्न सफल भए।

लन्डनस्थित नेपाली दूतावासले प्रायोजन गरेको ‘एम्बासडर कप’ विजेता घान्द्रुक समाज यूकेले नगद ११ सय पाउन्डसहित कप प्राप्त गरयो । दोस्रो स्थान जित्ने सिक्लेस पार्चे समाज यूकेले नगद ७ सय पाउन्ड र तेस्रो स्थानको तमु समाज यूकेले नगद ५ सय पाउन्डसहित पुरस्कार पाए।

मेलामा प्रस्तुत झांकीहरुमध्ये उत्कृष्ट बन्दै सिक्लेस पार्चे समाज यूके पहिलो स्थान प्राप्त गर्न सफल भएको थियो। त्यस्तै, झाँकीतर्फ दोस्रो र तेस्रो स्थान क्रमशः घान्द्रुक समाज यूके र किरांत राई यायोक्खाले ओगट्न सफल भए।

तस्बिर मिलन तमु

सांस्कृतिक नृत्य प्रतियोगितामा भने तमु समाज यूके उत्कृष्ट बन्दै पहिलो स्थानमा आउँदा घान्द्रुक समाज यूके दोस्रो स्थान प्राप्त गर्न सफल भएको थियो।

झाँकी र नृत्य दुवै विधामा प्रथम, दोस्रो र तेस्रो हुने संस्थाले क्रमशः पांच सय, तीन सय र दुई सय पाउन्ड नगद पुरस्कार प्राप्त गरे।

विभिन्न संघसंस्थाद्वारा प्रस्तुत झाँकीहरुको मूल्यांकनका लागि निर्णायकहरुमा विमला सेने, गोमा राना, प्रमिला लाबुङ राई, पदम गुरुङ र कल्पना राई थिए ।

नृत्य प्रतियोगितामा निर्णायकको भूमिका सरु रानामगर, कृष्ण गुरुङ र कविता घर्तीमगर गुरुङले निर्वाह गरेका थिए ।

मेला हेर्न छिमेकी देश भारत, पाकिस्तान र बंगलादेशका कूटनीतिज्ञसहित झण्डै ५ हजार नेपाली सहभागी थिए । तस्विरहरु- शिव भण्डारी

तस्बिर मिलन तमु