बेलायतबाट फर्किएका डा सुवेदी जापानका लागि राजदूत नियुक्त

लन्डन। बेलायतका लागि नेपालका पूर्व राजदूत डा दुर्गाबहादुर सुवेदी जापानको लागि नेपाली राजदूत नियुक्त भएका छन्।

मन्त्रिपरिषदको सिफारिशमा राष्ट्रपति विद्यादेवी भन्डारीले डा सुवेदीलाई आइतबार जापानका लागि आवासीय राजदूत नियुक्त गरेकी हुन्।

जापानका लागि नवनियुक्त राजदूत सुवेदी यसअघि बेलायतमा एक कार्यकाल राजदूतको जिम्मेवारी पूरा गरी फर्किएका थिए। 

बेलायतका लागि नेपालको २० औँ राजदूतको रुपमा नियुक्त डा सुवेदीले सन् २०१६ सेप्टेम्बर महिनामा आफ्नो कार्यभार सम्हालेका थिए। चार वर्षे कार्यकाल सकिएको केही महिनापछि सन् २०२० को अन्त्यमा उनी नेपाल फर्किएका थिए।

बेलायतमा रहंदा डा सुवेदीले पूर्व गोर्खाहरुको मुद्धालाई बेलायत तथा नेपालका सरकारस्तरको छलफलसम्म पुर्‍याउन विशेष भूमिका निर्वाह गरेका थिए।  

बेलायतबाट फर्किएपछि उनी नेपाल सरकारको शिष्टाचार महापालको भूमिकामा कार्यरत रहंदै आएका थिए।