कोलबर्न टाउन मेयर डा. शर्मा सरसफाइमा आफैं जुटे

लन्डन । इंग्ल्याण्डको कोलबर्न टाउन काउन्सिलका नवनिर्वाचित मेयर डा. जगन्नाथ शर्माको नेतृत्वमा नगर सरसफाइ गरिएको छ । गत २७ र २८ मे दुई दिन कोलबर्न टाउन सेन्टर ब्रोडवेमा गरिएको सरसफाइमा नेपाली, फिजियनसहित अन्य समुदायका स्वयंसेवकहरु पनि सहभागी थिए ।

नगरमा मौलाइरहेको झारपात उखेल्ने, माटो थप्ने, बाटो सरसफाइ र अन्य फोहोर व्यवस्थापन गरिएको मेयर डा. शर्माले बताए । फुल रोप्न १२ वटा स्थानका झार उखेलिएको थियो । ‘हाम्रो लक्ष्य नगर सफा, हरियाली र आकर्षक बनाउने हो,’ मेयर शर्माले भने । स्थानीय बासिन्दालाई सडकमा फोहोर नफाल्न उत्प्रेरित गर्ने पनि आफ्नो उद्देश्य रहेको शर्माले बताए ।

उनले सरसफाइमा सहयोग गर्ने सबै स्वयंसेवकहरुप्रति आभार समेत व्यक्त गरे । शर्माले स्वयंसेवकहरुलाई एभरेष्ट टेकवेबाट मःम उपलव्ध गराएका थिए ।