मोडल तथा नायक कुमुदलाई जन्मदिनमा ‘सरप्राइज गिफ्ट’

लण्डन- पछिल्लो समय सामाजिक सेवामा सक्रिय बेलायतनिवासी कलाकार, मोडल तथा निर्देशक कुमुद पन्तलाई जन्मदिनमा ‘सरप्राइज गिफ्ट’ मिलेको छ ।

मोडलिङबाट पनि बेलायतमा मजाले टिक्ने हैसियत बनाएका कुमुद अब नयाँ फिल्ममा अभिनय गर्ने भएका छन् ।  

बिहीबार संगीतकार तथा एरेन्जर विपिन आचार्यले फेसबुकमा लेखे- ‘आजको रेकर्डिङ चलचित्र ‘लौ कुमुदे हिँड्यो हिरो बन्न’ को शीर्ष गीत । शब्द जानकी पन्त जून, स्वर प्रमोद खरेल, संगीत/एरेन्ज विपिन आचार्य । यो चलचित्रमा कुमुद पन्त दाई नायकको रुपमा खेल्नुहुने छ ।’

अन्तर्राष्ट्रिय फिल्ममा सम्झनलायक भूमिकाको ताकमा रहेका कुमुद आफ्नो जन्मदिनमा यस्तो खवर आउनुलाई ‘सरप्राइज गिफ्ट’ मिलेको बताउंछन्  ।

‘अहिलेसम्मको अनुभवको आधारमा एक दिन अन्तर्राष्ट्रिय फिल्ममा खेल्ने आफ्नो सपना पूरा हुनेछ भन्न आशा छ’, कुमुद भन्छन्।

बेलायत बसेर कुमुदले नेपालका दु:खी, गरिवका लागि नियमित च्यारिटी गर्दै आएका छन्  ।