युक्रेनमा बस र ट्यांकर जुध्दा २६ को मृत्यु, १२ घाइते

फाइल फोटो

कीभ, २१ बैशाख- युक्रेनको पश्चिमी क्षेत्रमा भएको दुर्घटनामा परी २६ जनाको मृत्यु भएको छ ।

सरकारी अधिकारीहरुले बुधबार दिएको जानकारीअनुसार सुरुमा मृतकको सङ्ख्या थोरै देखिएपनि अहिलेसम्म २६ जनाको मृत्यु भएको पुष्टि भएको हो ।

यात्रु बहाक एउटा बस अर्को पेट्रोलियम पदार्थ ढुवानी गर्ने ट्यांकरसँग ठोक्किएर दुर्घटना भएको अधिकारीहरुले जनाएका छन् ।

देशको पश्चिमी क्षेत्रमा पर्ने रिभ्ने क्षेत्रमा मंगलबार भएको दुर्घटनालाई राष्ट्रपति भोलोदिमिर जेलेन्स्कीले ‘अत्यन्त दुःखद दुर्घटना’ भनेका छन् ।

‘दुर्घटनामा परी अहिलेसम्म कुल २६ जनाको मृत्यु भएको छ, ती मध्ये २६ जना यात्रु हुन भने दुई जना चालक हुन्’, प्रहरीले जारी गरेको वक्तव्यमा लेखिएको छ ।

घटनामा परी अरु १२ जना घाइते भएको र उनीहरुको विभिन्न अस्पतालमा उपचार गराइएको प्रहरीले जनाएको छ ।

प्रहरीले घटनामा मृत्यु भएकाहरुको पहिचान खोज्ने कार्य भइरहेको जानकारी दिएको छ । पीडितमध्ये अधिकांश युवा रहेको पनि जनाइएको छ ।

रुसी आक्रमणमा परी सयौँ युक्रेनीहरुको मृत्यु भइरहेका बेला दुर्घटनामा परी २६ युक्रेनीको मृत्यु भएको हो ।