नवनियुक्त राजदूत आचार्य बुधबार लन्डन आइपुग्दै

लन्डन । बेलायतका लागि नवनियुक्त नेपाली राजदूत ज्ञानचन्द्र आचार्य बुधबार लन्डन आइपुग्ने भएका छन् ।  

लन्डनस्थित नेपाली दूतावास स्रोतका अनुसार राजदूत आचार्य बुधबार बिहान लन्डन उत्रिनेछन् । कतार एयरवेजको उडानमा मंगलबार साँझ काठमाडौँबाट उड्ने र बुधबार बिहान लन्डन आइपुग्ने उनको तालिका छ ।

लन्डन आइपुगेपछि राजदूत आचार्यले सम्भवत: सोही दिनदेखि आफ्नो कार्यभार सम्हाल्नेछन् ।  

बेलायतका लागि २२ औँ नेपाली राजदूतका रुपमा उनी झन्डै एक महिनाअघि नियुक्त भएका थिए ।

आचार्यले कार्यभार सम्हालेलगत्तै पछिल्लो समय अवरुद्ध बनेको गोर्खा वार्ताले पनि गति लिने अपेक्षा छ । गोर्खा मुद्धामा बेलायतसंगको वार्ताका लागि नेपाल सरकारले उनलाई जिम्मेवारी दिइसकेको छ ।