पाल्पामा मलामी बस दुर्घटना, आठको मृत्‍यु

बुटवल । शव बोकेर बुटवलबाट रिडीतर्फ जाँदै गरेको एक बस पाल्पामा दुर्घटना हुँदा ८ जनाको मृत्यु भएको छ । अरु ८ जना घाइते भएका छन् ।

लु १ ख ७२७९ नम्बरको बस पाल्पाको रिब्दीकोट गाउँपालिका– २ लघुवामा दुर्घटना भई ६० मिटर तल खसेको जिल्ला प्रहरी कार्यालयका प्रहरी नायब उपरीक्षक रामेश्वर श्वातीले बताए । 

दुर्घटनामा घाइते भएकाहरुलाई उपचार गर्न तानसेनस्थित मिसन अस्पतालमा पठाइएको छ ।

शनिबार मृत्यु भएका बुटवल रानीगञ्ज निवासी ७० वर्षीय वीरबहादुर विश्वकर्माको शव लिएर मलामी गएका ३६ जना सवार बस दुर्घटनामा परेको हो । दुर्घटना बिहान १०:३० बजे भएको हो ।