अमेरिकी राष्ट्रपतिले प्रजातान्त्रिक शिखर सम्मेलनमा डाके ११० देशका प्रमुख 

तस्बिर एएफपी

वासिङ्टन–अमेरिकी राष्ट्रपति जो बाइडेनले आफूले आयोजना गरेको प्रजातान्त्रिक शिखर सम्मेलनमा ताइवानसहित ११० देशका प्रमुख तथा प्रतिनिधिहरुलाई निमन्त्रणा गरेका छन् ।

भर्चुअल माध्यमबाट हुने सम्मेलनमा एक सयभन्दा बढी देशका प्रमुख तथा प्रतिनिधिहरु सहभागी हुने अपेक्षा गरिएको छ ।

लोकतन्त्रलाई केन्द्रमा राखेर आयोजना गरिएको उक्त सम्मेलनमा सहभागिताका लागि अमेरिकी राष्ट्रपति बाइडेनले संसारभरिका प्रजातान्त्रिक मुलुकका प्रतिनिधिहरुलाई निमन्त्रणा गरेका हुन् ।

सम्मेलन आगामी डिसेम्बर ९ र १० तारिखमा हुने तय भएको छ । सम्मेलनमा दक्षिण एसियाली क्षेत्रबाट नेपाल, भारत, पाकिस्तान र माल्दिभ्सलाई मात्र निमन्त्रणा गरिएको अमेरिकी विदेश मन्त्रालयले जनाएको छ ।

बंगलादेश, भुटान, श्रीलंका र अफगानिस्तानको नाम भने अमेरिकाले निमन्त्रणा गरेका देशहरुको सूचीमा छैन् । बाइडेनले प्रजातान्त्रिक मुलुकहरूबीच सम्बन्ध मजबुत बनाउन सम्मेलन आयोजना गरेको बताएका छन् ।