भोजपुर प्रतिभा सम्मान र पुरस्कार तमोट र राईलाई

लन्डन––भोजपुर प्रतिभा प्रतिष्ठानले प्रत्येक दुई वर्षमा प्रदान गर्दै आएको प्रतिभा सम्मान र प्रतिभा पुरस्कार २०७८ घोषणा गरेको छ ।

प्रतिष्ठानले यस वर्ष संगीत तथा नाट्य प्रज्ञा प्रतिष्ठानका सदस्य सचिव गीतकार, कवि श्याम तमोटलाई भोजपुर प्रतिभा सम्मान र लेखिका कविता राईलाई प्रतिभा पुरस्कार प्रदान गर्ने निर्णय गरेको छ ।

प्रत्येक दुई वर्षमा प्रदान गरिने प्रतिभा सम्मानको राशी दश हजार रुपैयाँ र ताम्रपत्र छ भने प्रतिभा पुरस्कार राशी पैतिस हजार रुपैयाँ तथा ताम्रपत्र छ ।

संस्थाले यस अघि साहित्यकारहरु पूर्ण प्रकाश यात्री, परशु प्रधान, कृष्ण जोशी, जिवी लुगुन, सैलेन्द्र साकार, मन्जुल, गायक तथा संगीतकार गणेश रसीक र इतिहासकार ज्ञानमणि नेपाललाई सम्मान गरिसकेको छ ।

यसैगरी स्रष्टाहरु कवि श्रवण मुकारुङ, संगीतकार दिनेश वान्तवा, कविहरु विप्लक ढकाल, विमल गीरी, धाविका मीरा राई, कवि तथा समालोचक पूर्ण इन्फादा र गायक भिषण मुकारुङ पुरस्कृत भइसकेका छन् ।

निकट भविष्यमा एक कार्यक्रम गरी सम्मान र पुरस्कार प्रदान गरिने संस्थाका अध्यक्ष दयाकृष्ण राईले जानकारी दिए ।