अष्ट्रेलियाले अन्तरराष्ट्रिय यात्रा र सीमा प्रतिबन्ध सहज बनाउने 

क्यानबेरा–अष्ट्रेलियाका प्रधानमन्त्री स्कट मोरिसनले शुक्रबार अन्तरराष्ट्रिय यात्रा पुनः खोल्ने र सीमा प्रतिबन्ध सहज बनाउने घोषणा गरेका छन् ।
मोरिसनका अनुसार उक्त घोषणा साउथ वेल्सबाट शुरू हुने छ र ८० प्रतिशत खोप लगाइएका राज्यहरूका लागि अन्तर्राष्ट्रिय सिमाना अर्को महिनादेखि खुला रहनेछ ।

पूर्णरूपमा खोप लगाइएका अष्ट्रेलियालीहरू र वेल्समा आउने स्थायी बासिन्दाहरू होटलमा महंगो क्वारिन्टिन बसाइँको सट्टा एक हप्ताका लागि घरमै क्वारिन्टिनमा बस्न सक्ने व्यवस्था मिलाइएको समाचार माध्यमले जनाएका छन् ।

पूरै खोप लगाएका अष्ट्रेलियालीहरूलाई व्यावसायिक उडानमार्फत आवतजावत खुला गरिनेछ ।

गत वर्ष मार्च २० मा अस्ट्रेलियाले कोरोनाभाइरस महामारीलाई मध्यनजर गर्दै विश्वको सबैभन्दा कडा प्रकारको सीमा प्रतिबन्ध लगाएको थियो जसबाट १८ महिनायता सीमा नाकाहरू बन्द गरिएका छन् ।

प्रधानमन्त्री मोरिसनका अनुसार सरकारले न्यूजिल्याण्ड जस्ता केही देशबीच क्वारेन्टिनमा बस्न नपर्ने गरी यात्रा सहज गर्नेबारे उचित समयमा निर्णय लिनेछ । सरकारले जनताको सुरक्षाका निम्ति यथासम्भव प्रयत्न गर्दै पूर्ण सुरक्षाको प्रत्याभूति दिलाएको छ ।

१२ वर्षभन्दा कम उमेर समूह र चिकित्सकीय परामर्शममा रहेका बाहेक सबैले यात्राका निम्ति पूर्णरूपमा पूरै मात्रा खोप लगाएको हुनुपर्ने प्रधानमन्त्री मोरिसनले बताएका छन् ।

यसैबीच, खोप नलगाएका यात्रुहरूका लागि भने १५ दिनको होटल क्वारिन्टिन आवश्यकता पर्नेछ।

सरकारले खोप लगाएका यात्रुहरुको ट्राभल क्याप्स हटाउन राज्यहरूसँग मिलेर काम गर्ने जनाएको छ। एबीसी समाचार माध्यमले जनाएअनुसार अष्ट्रेलियाले कोभिड परीक्षणको दायरालाई विस्तार गर्दै यात्राकै दौरानमा पनि यसलाई निरन्तता दिने जनाएको छ ।