खोपको असमान वितरणबारे राष्ट्रसंघको महासभामा छलफल

सम्बोधनका क्रममा नर्वेकी प्रधानमन्त्री इर्ना सोल्बेर्ग । तस्बिर एपी

न्यूयोर्क, ७ असोज– विश्वव्यापी रूपमा खोपको असमान वितरणका बारेमा संयुक्त राष्ट्रसंघको महासभामा कुरा उठेको छ । विशेष गरेर अफ्रिकी तथा खोपको पहुँच कम भएका देशका प्रतिनिधिहरूले खोपको समान वितरण हुनुपर्नेमा जोड दिएका हुन् ।

खोपको उपलब्धता सबै देशमा समान तरिकाले नभएमा विश्वमा ठूलो मानवीय संकट उत्पन्न हुन सक्ने चेतावनी पनि विश्व नेताहरुले दिएका छन् ।

धनी तथा शक्तिशाली र विकसित देशहरूले खोप आफुहरूमा केन्द्रित गरेको र गरिब तथा अविकसित देशहरूमा खोपको पहुँच निकै कम भएको महासभामा बोल्ने बक्ताहरूले दावी गरेका हुन् ।

आगामी दिनमा यस बारेमा गम्भीरतापूर्वक ध्यान दिएर अहिलेको अवस्थामा सुधार ल्याउन समेत उनीहरूले माग गरेका छन् ।

नर्वेकी प्रधानमन्त्री इर्ना सोल्बेर्गले भनिन्, “कतिपय देशले आफ्ना अधिकांश नागरिकलाई खोप लगाएर अहिले महामारी नियन्त्रणको अवस्थामा पुगेका छन् तर कतिपय देशहरुले भने पर्याप्त खोप पाएका छैनन् । यसकारण खोपमा पहुँच नहुने देशको स्वास्थ्य प्रणाली दयनीय अवस्थामा छ । यो धेरै गम्भीर विषय हो ।”

उनले थपिन्, “अफ्रिकी मुलुकहरुमा २० मध्ये एक जनाले मात्रै खोप पाएका छन् भने युरोपेली मुलुकहरूमा दुईमध्ये एक जनाले खोप पाएका छन्, यस्तो असमानता स्पष्ट रूपमा नराम्रो हो ।”

महासभामा दक्षिण अफ्रिका, बोट्स्वाना, अंगोला, बुर्किना फासो, लिबियालगायतका देशका नेताहरुले पनि खोपको असमान वितरणका बारेमा आवाज उठाएका थिए ।

विश्वमा आगामी वर्ष सन् २०२२ मा कोरोनाभाइरस विरुद्धको खोपको उपलब्धता समान हुने व्यवस्था गर्न पनि उनीहरूले माग गरेका थिए ।

सयुक्त राष्ट्रसंघीय मुख्यालय न्यूयोर्कमा ७६औँ महासभा चलिरहेको छ जहां विश्व नेताहरूको उल्लेख्य सहभागिता छ ।