नेपालमा कोरोनाबाट दोस्रो मृत्यु पुष्टी

काठमाडौं । नेपालमा कोरोना भाइरस संक्रमणबाट दोस्रो व्यक्तिको मृत्यु भएको पुष्टी भएको छ ।

बाँकेको नरैनापुर गाउँपालिकास्थित क्वारेन्टिनमा बसेकै बेला मृत्यु भएका युवकमा संक्रमण पुष्टी भएको स्वास्थ्य तथा जनसंख्या मन्त्रालयले पुष्टी गरेको छ ।

गत वैशाख ३० मा भारतको मुम्बईबाट आएर क्वारेन्टिनमा रहेका २५ वर्षीय युवकको बिहान अचानक स्वास्थ्यावस्था असामान्य भएपछि क्वारेन्टिनमै मृत्यु भएको थियो ।

यसअघि शनिबार मात्रै नेपालमा कोरोनाका कारण भएको पहिलो मृत्यु पुष्टी भएको थियो । सिन्धुपाल्चोककी २९ वर्षीया सुत्केरी महिला नेपालमा कोरोनाबाट ज्यान गुमाउने पहिलो व्यक्ति थिइन् ।

यससंगै नेपालमा कोरोना भाइरस संक्रमणबाट ज्यान गुमाउनेको संख्या २ पुगेको छ ।