लकडाउन हट्दै जाँदा तंग्रिन थाल्यो बेलायती अर्थतन्त्र

लन्डन । कोभिड महामारी र लामो समयदेखिको लकडाउनका कारण थला परेको बेलायती अर्थतन्त्र बिस्तारै तंग्रिन थालेको छ ।  

सन् २०२१ को पहिलो तीन महिनाको अवधिमा १ दशमलव ५ प्रतिशतले खुम्चिएको अर्थतन्त्र मार्चपछि भने फेरि उकालो लाग्न थालेको छ ।  

लकडाउनका कारण बन्द स्कुलहरु सुचारु हुनु र रिटेल स्पेन्डिङ बढ्नु जस्ता आधारले मार्च महिनामा बेलायतले २ दशमलव १ प्रतिशतको आर्थिक वृद्धि हासिल गरेको छ । गत वर्षको अगस्ट महिनायता बेलायतको अर्थतन्त्रले एक महिनाकै अवधिमा हासिल गरेको यो नै सबभन्दा ठूलो आर्थिक वृद्धि हो ।

‘इन्स्टिच्युट अफ डिरेक्टर्स’ का प्रमुख अर्थशास्त्री तेज पारिखका अनुसार बेलायतको अर्थतन्त्र यो वर्ष ‘बाउन्स ब्याक’ गर्दैछ ।

‘महामारी र लकडाउनका साथै युरोपसंगको फेरिएको सम्बन्ध र व्यवस्थाका कारण पनि यस वर्षको पहिलो त्रैमासिक अवधिमा आर्थिक गतिविधिहरु सेलाएका थिए’, उनले भने, ‘संक्रमण घट्दै जाँदा लकडाउन क्रमश: हटेर आर्थिक क्रियाकलापहरु सुचारु भएपछि अब छिट्टै अवस्था परिवर्तन हुनेछ ।’

बेलायत सरकारका अर्थमन्त्री ऋषि सुनाकले पनि बेलायत कोभिड महामारीपछिको ‘रिकभरी’ का लागि अब तम्तयार रहेको बताएका छन्  ।  

बैंक अफ इंग्ल्याण्डले यो वर्ष लकडाउन अन्त्यसंगै बेलायतले पछिल्लो ७० वर्षकै सबैभन्दा उच्च आर्थिक वृद्धि हासिल गर्ने प्रक्षेपण गरेको छ ।