कीर्तिमानी जीतसँगै नेपाललाई टी-२० सिरिजको उपाधि, भुर्तेल उत्कृष्ट खेलाडी

काठमाडौं । नेपालले त्रिकोणात्मक टी-२० सिरिजको उपाधि जितेको छ ।

शनिबार सम्पन्न फाइनलमा नेदरल्याण्ड्सलाई १४२ रनले पराजित गर्दै नेपालले उपाधि जितेको हो  ।

नेपाललाई उपाधि जिताउने खेलमा कुशल भुर्तेलसँगै कुशल मल्ल र उपकप्तान दिपेन्द्र सिंह ऐरीको ब्याटिङ महत्वपूर्ण रह्यो ।  

शुरुवाती ब्याटिङ गरेको नेपालले २३८ रनको कीर्तिमानी स्कोर खडा गरेको गरेको थियो । जवाफमा नेदरल्याण्ड्स १७.२ ओभरमा सबै विकेट गुमाएर ९६ रनमै समेटियो ।

नेपालले नेदरल्याण्ड्समाथि निकालेको १४२ रनको जित नेपालको लागि टी-२० अन्तराष्ट्रियमा सबैभन्दा फराकिलो अन्तरको जीत हो । यसअघि नेपालले १३औं सागमा भुटानलाई १४१ रनले हराएको थियो ।

यो उपाधि नेपालले घरेलु मैदानमै जितेको ११ वर्षपछिकै पहिलो पनि हो । सन् २०१० मा आईसीसी डिभिजन फाइभको उपाधि जितेयता नेपालले घरेलु मैदानमै कुनै अन्तरराष्ट्रिय उपाधि जित्न सकेको थिएन ।

नेपाली युवा खेलाडी कुशल भुर्तेल त्रिदेशीय टी–२० क्रिकेट सिरिजको उत्कृष्ट खेलाडी बनेका छन् । पाँच खेलमा चार अर्धशतकसहित कूल २७८ रन बनाएका उनी ‘प्लेयर अफ दि सिरिज’ घोषित भएका हुन् ।   

त्रिकोणत्मक टी २० सिरिज क्रिकेटमा विजेता नेपाली राष्ट्रिय क्रिकेट टोलीका कप्तान ज्ञानेन्द्र मल्ललाई ट्रफी प्रदान गर्दै राष्ट्रिय खेलकुद परिषदका सदस्यसचिव रमेशकुमार सिलवाललगायत । शनिबार कीर्तिपुरस्थित त्रिवि अन्तरराष्ट्रिय क्रिकेट मैदानमा नेपालले नेदरल्याडसलाई पराजित गरेको हो । तस्वीर- रोशन सापकोटा, रासस

प्लेयर अफ दि सिरिज भएका भुर्तेलले पल्सर मोटरसाइकल पुरस्कारस्वरुप गरे । उनले नेदरल्यान्ड्सविरुद्धको पहिलो खेलमा ६२, मलेशियासितको खेलमा ६१, नेदरल्यान्ड्सविरुद्धको दोस्रो खेलमा ६२ तथा फाइनल खेलमा आज नेदरल्यान्ड्सविरुद्ध फाइनल खेलमा ७७ रन बनाएका थिए । 

भुर्तेल एकै सिरिजमा चार अर्धशतक प्रहार गर्ने पहिलो नेपाली खेलाडीसमेत बनेका छन् । उनले टी–२० क्रिकेटमा डेब्यु खेलमा लगातार तीन अर्धशतक बनाउने कीर्तिमानसमेत बनाए ।

यसैगरी सिरिजमा सर्वाधिक विकेट लिने खेलाडी सन्दीप लामिछाने बनेका छन् । उनले सिरिजको पाँच खेलमा १३ विकेट लिए  । टी–२० क्रिकेटमा १०० खेल खेल्ने पहिलो नेपाली खेलाडीसमेत बनेका लामिछानेले १०१ खेलमा १३८ विकेट लिएका छन् ।