बेलायतमा ६०३ कोरोना संक्रमितको मृत्यु

लन्डन । बेलायतमा कोरोना संक्रमण दर केही दिनयता कम देखिए पनि मृतक संख्या भने घटेको छैन । वीकेन्डका दिनमा कम देखिए पनि बाँकी दिनमा पाँच सयको हाराहारीमा मृतक संख्या थपिदै गएका छन् ।

मंगलबार २४ घन्टामा थप ६०३ जना कोरोना संक्रमितको मृत्यु भएको ‘डिपार्टमेन्ट अफ हेल्थ एण्ड सोशल केयर’ ले जनाएको छ । हिजो सोमबार २०५ जना कोरोना संक्रमितको मृत्यु भएकोमा आज यो संख्या ६ सय नाघेको छ ।

यससंगै बेलायतमा कोरोना संक्रमणबाट मृत्यु हुनेको संख्या ५९ हजार ५१ पुगेको छ ।

यसैगरी कोरोना संक्रमितको संख्या पनि १६ लाख ४३ हजार ८६ पुगेको छ । पछिल्लो २४ घन्टामा १३ हजार ४३० जनामा नयाँ संक्रमण पुष्टि भएको स्वास्थ्य विभागले जानकारी दिएको छ । संक्रमित संख्यामा भने केही दिन यता कम छ ।

यसैगरी गएको २४ घन्टामा थप एक हजार ३६९ जना कोरोना संक्रमित हस्पिटल भर्ना भएका छन् । हाल बेलायतका हस्पिटलमा १५ हजार भन्दा बढी कोरोना संक्रमितको उपचार भैरहेको छ । एक हजार ४२५ जनाको भेन्टिलेटर बेडमा राखेर उपचार भैरहेको विभागले जनाएको छ ।