अल्डरसटमा दिनदहाडै लुटिइन् ७० वर्षीया नेपाली वृद्धा

अल्डरसटस्थित बुद्धिष्ट कम्युनिटी सेन्टरको सिंढीमा बसिरहेकी वृद्धाबाट दिनदहाडै घाँटीको सिक्री लुटिएको हो

लन्डन । बेलायतमा नेपालीहरुको उल्लेख्य बसोबास रहेको अल्डरसटमा दिनदहाडै एक नेपाली वृद्धा लुटिएकी छन् ।  

गत सेप्टेम्बर १९ शनिबार दिउँसो तीनजना गोरो वर्णका महिलाहरुले ७० वर्षीया नेपाली वृद्धाले घाँटीमा लगाएको सुनको सिक्री ‘कठोर तरिकाले’ लुटेको ह्याम्प्शायर प्रहरीले जनाएको छ ।  

दिउंसो पौने २ देखि सवा २ बजेभित्रको समयमा अल्डरसटस्थित बुद्धिष्ट कम्युनिटी सेन्टरबाहिर घटना भएको हो । सेन्टरको सिंढीमा बसिरहेकी वृद्धाबाट लुटेरा महिलाहरुले घाँटीको सिक्री लुटेर भागेका प्रहरीले जनाएको छ ।

प्रहरीका अनुसार शुरुमा दुई अपरिचित महिलाहरु आएर पीडितलाई समय सोध्छन् । उनीहरुले पीडितको ध्यान अन्यत्र मोडेर तेस्रो महिलाले पीडितको पछाडिबाट घाँटीमा लगाएको सुनको सिक्री झम्टिन्छे । र, सिक्री चुंडिएपछि तिनै जना महिला सिक्री लिएर भाग्छन् ।

प्रहरीले लुटपाटमा संलग्नहरुको खोजी भइरहेको भन्दै यसबारे कुनै पनि सूचना भए उपलब्ध गराउन आग्रह गरेको छ ।   

साथै, कोही शंकास्पद व्यक्तिले २४ क्यारेटको सुनको चुंडिएको सिक्री बेच्ने कोशिस गरेको पाए १०१ मा रेफरेन्स नम्बर ४४२००३६३९०७ का साथ फोन गर्न प्रहरीले आग्रह गरेको छ ।

वैकल्पिक रूपमा गोप्य तरिकाले ‘क्राइम स्टपर्स’ लाई ०८०० ५५५ १११ मा पनि फोन गरेर खबर गर्न सकिनेछ ।