ट्रम्पको नियोजित भन्सार शुल्क वृद्धि रोक्ने निर्णयको स्वागत

ईयू प्रमुख उर्सुला भन डेर लेयन । तस्बिर- एपी

ब्रसेल्स, चैत २८ गते । युरोपेली सङ्घ (ईयू) प्रमुख उर्सुला भन डेर लेयनले बिहीबार अमेरिकी राष्ट्रपति डोनाल्ड ट्रम्पको नियोजित भन्सार शुल्क वृद्धि रोक्ने निर्णय ‘विश्व अर्थतन्त्रलाई स्थिर बनाउने दिशामा महत्त्वपूर्ण कदम’ का रूपमा स्वागत गरेकी छन् ।

“व्यापार र आपूर्ति शृङ्खलाले काम गर्नका लागि स्पष्ट, पूर्वानुमानयोग्य अवस्थाहरू आवश्यक छन्”, कार र अन्य औद्योगिक सामानहरूका लागि द्विपक्षीय भन्सार शुल्क छुटको ब्लकको प्रस्ताव दोहो¥याउँदै युरोपेली आयोगकी अध्यक्षले एक विज्ञप्तिमा भनेकी छन्, “युरोपेली सङ्घ संयुक्त राज्य अमेरिकासँग रचनात्मक वार्ताका लागि प्रतिबद्ध छ ।”

ईयूमा ट्रम्पको विश्वव्यापी भन्सार शुल्कको अंशका रूपमा २० प्रतिशत दर लगाइएको थियो र आयोगले यसको जवाफ तयार गरिरहेको छ । यद्यपि ब्रसेल्सले प्रतिशोध लिन नचाहेको स्पष्ट पारेको छ ।

ट्रम्पले बुधबार ९० दिनका लागि लगभग सबै राष्ट्रका लागि उपायहरू रोक्ने घोषणा गर्नुअघि गत हप्ता दण्डात्मक भन्सार शुल्कहरूको घोषणा गरेर विश्वव्यापी बजारहरूलाई अराजकतामा फ्याँकेका थिए ।

अहिले १० प्रतिशतको आधारभूत भन्सार शुल्क दरको सामना गर्ने २७ राष्ट्रको ईयू दर्जनौँ देशमध्ये एक हो । १० प्रतिशतको आधारभूत भन्सार शुल्क दरको सामना गर्ने मुलुकमा जापान पनि समावेश छ तर चीन छैन ।

यो ब्लक स्टिल र एलुमिनियममा पहिले लागू गरिएको अमेरिकी भन्सार शुल्कको अधीनमा छ । यसको प्रतिशोध उसले बुधबार लिएको छ ।

ट्रम्पको आक्रामक व्यापार कदमहरू र ईयूविरुद्धको शत्रुतापूर्ण वक्तव्यले ब्रसेल्समा दिमाग केन्द्रित गरेको छ । अहिले नेताहरू भारत लगायत अन्य राष्ट्रसँग नजिकको व्यापार सम्बन्ध स्थापना गर्न अगाडि बढिरहेका छन् ।

“युरोप विश्व व्यापारको ८७ प्रतिशत ओगट्ने देशहरूसँग संलग्न हुँदै आफ्नो व्यापार साझेदारीहरू विविधीकरण गर्नमा निरन्तर केन्द्रित छ”, भन डेर लेयनले भनिन् ।

ईयूले आफ्नो एकल बजारलाई पनि बलियो बनाउने र अवरोधहरू हटाउने उनले बताइन् ।