क्षेत्री समाज बेलायतले चुन्यो नयाँ नेतृत्व, अध्यक्षमा टेक जिसी

लन्डन- क्षेत्री समाज बेलायतले नयाँ नेतृत्व चुनेको छ । शनिबार अल्डरसटमा सम्पन्न नवौं अधिवेशनले क्या. टेक जिसीको नेतृत्वमा सर्वसम्मत २१ सदस्यीय नयाँ कार्यसमिति (२०२५ -२७) चयन गरेको हो । नयाँ कार्यसमितिअन्तर्गत एक महिलासहित तीनजना उपाध्यक्षमा नरेन्द्र बस्नेत, दिल जिसी र श्रीमती प्रतिमा केसी चुनिएका छन् ।

अधिवेशनमार्फत महासचिवमा मेजर बुद्धि भण्डारी (एमभीओ),सह-सचिवमा आनन्द थापा, कोषाध्यक्ष संजय ध्वज भण्डारी, सह-कोषाध्यक्ष मेजर चक्र खत्री, जनसम्पर्क सचिव रेशम खड्का, सांस्कृतिक सचिवमा सन्तोषी कार्की, महिला संयोजकमा माया केसी र मिडिया सचिवमा राममाया बिष्ट केसी चुनिएका छन् ।

कार्यसमिति सदस्यहरुमा महेन्द्र कुँवर, श्रीमती अन्जना थापा, राजु बोहोरा, श्रीमती हिमा क्षेत्री, कृष्ण थापा, श्रीमती सम्झना अधिकारी क्षेत्री, सरोज थापा, श्रीमती शिला थापा केसी र श्रीमती विमला थापा छन् ।

नयाँ कार्यसमिति चुन्न सल्लाहकार डा राम अधिकारी, पूर्व अध्यक्ष तथा वर्तमान सल्लाहकार रि क्या धन कुँवर र पूर्व अध्यक्ष तथा सल्लाहकार यज्ञ क्षेत्री रहेको निर्वाचन कमिटी गठन गरिएको थियो ।

यसअघि अध्यक्ष श्रद्धा थापाको सभापतित्वमा भएको उक्त अधिवेशनमा स्वागत मन्तब्य दिंदै उपाध्यक्ष टेक जिसीले क्षेत्री समाजलाई यहाँसम्म ल्याइपुर्‍याउने सम्पूर्ण क्षेत्रीबन्धुलाई धन्यवाद दिए । अधिवेशन बन्द सत्रमा महासचिव ध्रुव गौतमले वाषिक प्रतिवेदन र कोषाध्यक्ष अन्जना  थापाले आयव्यय विवरण पेश गरेका थिए । 

सो अवसरमा निवर्तमान अध्यक्ष श्रद्धा थापाले नवनिर्वाचित अध्यक्ष जिसीलाई सम्पूर्ण कागजात बुझबुझारथ पनि गरेकी छन् ।

संस्थाका सल्लाहकार तथा पूर्वअध्यक्षहरुले समाजलाई अघि बढाउन सबैले मिलेर हातेमालो गर्नुपर्ने धारणा व्यक्त गरेका थिए । संरक्षक ध्रुब केसीले पनि समाजको योगदान तथा जिम्मेवारीको बारेमा उल्लेख गरेका थिए ।

नवनिर्वाचित अध्यक्ष जिसीले आफूलाई सर्वसम्मत नेतृत्व सुम्पिएर ठूलो जिम्मेवारी दिएकामा सबैप्रति आभार व्यक्त गरे । उनले संस्थाको उद्देश्य अनुरुप प्रभावकारी काम गर्न नयां कार्यसमिति सधैं अडिग रहने समेत बताए ।

सोहि अवसरमा गायक सूर्य खड्का (परदेशी गायक) लाई पनि समाजका तर्फबाट नवनिर्वाचित अध्यक्ष टेक जीसी र निवर्तमान अध्यक्ष श्रद्धा थापाले सम्मान तथा कदरपत्र प्रदान गरे ।  कार्यक्रमको अन्तमा गायक खड्काले केहि गीत गएर मनोरंजन दिलाएका थिए ।

बेलायतवासी क्षेत्रीहरुले आफ्नो समुदायको हकहित, नेपाली कला संस्कृति संवर्धन एवं मातृभूमिको विकासमा टेवा पुरयाउने उद्देश्यसहित सन् २००७ मा क्षेत्री समाज बेलायत स्थापना गरेका थिए ।