बेलायतमा नेपाली व्यवसायीले किने २ अर्ब १२ करोडमा दुईवटा केयर होम

लन्डन । बेलायतको स्वास्थ्य सेवा क्षेत्रमा अग्रणी स्थान बनाइसकेको बिरा केयर होम्सले दुई नयाँ केयर होम खरिद गरेको छ । 

उक्त कम्पनीले दक्षिण वेल्सको एब्बु भेल र इंग्ल्याण्ड हेरिफोर्डमा केयर होम खरिद गर्दै आफ्नो व्यवसाय अझ विस्तार गरेको हो । खरिदको कानुनी प्रक्रिया सकिएर बिराले मंगलबार आफूमा स्वामित्व लिएको छ । 

१२ मिलियन पाउण्ड (करिब २ अर्ब १२ करोड रुपैया) बढीको लगानीमा खरिद गरिएका ति दुई केयर होममा कुल १२३ शैया छन् । व्यवसाय खरिदमा बार्कलेज बैंक र डेभलपमेन्ट बैंक अफ वेल्सले सहयोग गरेका थिए ।

५४ शैयाको बैंकहाउस केयर होम (एब्बु भेल) र ६९ शैयाको हेरिफोर्डस्थित अर्को केयर होमले उच्चस्तरको डिमेन्सिया तथा नर्सिङ केयर सेवा प्रदान गर्ने बिरा केयर होम्सका प्रवन्ध निर्देशक विपी खनालले जनाए ।

यी दुई केयर होममा मात्र २०० बढी कर्मचारी कार्यरत हुनेछन्। नर्सिङ होम र केयर होम गरि ७ वटा व्यवसाय सञ्चालन गरिरहेको बिरा होम्स् कम्पनीमा हाल कार्यरत कुल कर्मचारी संख्या करिब ५०० पुगेसंगै यो बेलायतमा नेपालीमूलका व्यवसायीले सञ्चालन गरेको सबैभन्दा ठूलो केयर होम समूह बनेको छ ।

बिरा केयर होम्सको सफलताको कथा संस्थापक तथा प्रवन्ध निर्देशक बीपी खनालको प्रेरणादायक जीवन यात्रासँग जोडिएको छ । सन् १९९० को मध्य दशकमा खन, अर्घाखाँचीबाट मात्र १२ पाउण्ड (झण्डै २ हजार रुपैयाँ नेपाली) बोकेर काठमाडौं आएका खनालले शंकरदेव क्याम्पसमा अध्ययन गर्दैगर्दा एक वर्षमै शैक्षिक परामर्श संस्था स्थापना गरे । सन् १९९९ देखि २००१ सम्म उनले विदेशमा अध्ययन गर्न चाहने नेपाली विद्यार्थीलाई पठाउने नेपालको अग्रणी कन्सल्टेन्सी सञ्चालन गरे ।

व्यवसायिक सम्भावनाको खोजीमा उनी सन् २००१ देखि २००४ सम्म बेलायत आवतजावत गर्न थाले र सन् २००४ मा लन्डन ह्यारोमा नेपालीको पहिलो शैक्षिक परामर्श कम्पनी खोले । त्यसपछि सन् २००५ मा एउटा कलेज स्थापना गरे जुन पछि २०१० मा ७०० भन्दा बढी विद्यार्थीसहित विक्री गरे । त्यसपछि उनले सिंगापुरमा अर्को कलेज खरिद गरे ।

सन् २०११ मा खनाल दम्पतिले न्यूपोर्टमा पहिलो केयर होम खरिद गरेर स्वास्थ्य सेवा क्षेत्रमा पाइला टेके । आफ्नै नेतृत्वमा सञ्चालन गर्दै उनीहरुले क्रमशः २०१५ मा एभिन्यू रोड केयर होम, २०१७ मा रोजेल केयर होम तथा २०२३ को अन्त्यमा थप दुई केयर होम खरिद गरे ।

व्यवसायी खनालले १० मिलियन पाउण्ड लागतमा ५० शैयाको अर्को डिमेन्सिया केयर होम निर्माण योजना समेत अघि बढाइएको बताए ।

लामो संघर्ष, चुनौती र कहिलेकाहीँ वित्तिय संकट नजिकको क्षणहरु पार गर्दै आएको खनालको यो यात्रा दृढता र दूरदर्शी सोचको उत्कृष्ट उदाहरण पनि हो ।

खनाल दम्पत्ति

खनाल आफ्नो सफलताको श्रेय परिवारको सामूहिक सहयोगलाई दिन्छन् विशेषतः आफ्नी जीवनसंगिनी र तीन सन्तानलाई । उनका जेठा छोरा एलएसइबाट प्रथम श्रेणीमा स्नातक भई हाल बार्कलेज बैंकमा इनभेष्टमेन्ट बैंकरको रूपमा कार्यरत छन् । उनले व्यवसायको रणनीतिक निर्णयहरूमा प्रमुख भूमिका खेल्दै आएका छन्। 

अन्य दुई सन्तान समेत व्यवसायमा संलग्न छन्, जसमा १३ वर्षे कान्छा छोराले समेत नियमित छलफलमा सहभागिता जनाएर सहयोग गर्ने खनाल बताउंछन् ।

आगामी दिनमा बेलायतबाहेक नेपाल र अन्य मुलुकमा समेत लगानीको दायरा बढाउने सोच खनालको छ । सादा जीवन, कडा परिश्रम र अपराजित मनोवलले भरिएको खनाल परिवारको व्यवसायिक यात्रा युवापुस्ताका लागि प्रेरणाको स्रोत बनेको छ ।