बेलायतको रेलवे स्टेशनमा प्रहरीको गोलीबाट हतियारधारी व्यक्तिको मृत्यु

लन्डन- बेलायतको मिल्टन किन्स सेन्ट्रल रेलवे स्टेशनमा मंगलबार दिउँसो एक हतियारधारीको प्रहरीको गोली प्रहारबाट मृत्यु भएको छ ।

अपरान्ह  १२ः५५ बजे स्थानीय समयमा स्टेशनमा एक व्यक्ति बन्दुक लिएर घुमिरहेको भन्ने सूचना पाएपछि थेम्स भ्याली प्ररहरी र ब्रिटिश ट्रान्सपोर्ट प्रहरीको टोली घटनास्थल पुगेको बीबीसीले जनाएको छ।

प्रारम्भिक जानकारी अनुसार, उक्त शंकास्पद व्यक्तिलाई चेतावनी दिएपछि प्रहरीले गोली चलाएको बताइएको छ । प्रहरीले उक्त व्यक्तिको ज्यान बचाउने प्रयास गरे पनि दिउँसो १३ः४४ बजे मृत्यु भएको पुष्टि भएको हो ।

उक्त स्थानमा अहिले कुनै जोखिम नरहेको प्रहरी प्रवक्ताले जनाएका छन्, यद्धपि घटनाबारे विस्तृत विवरण आउन बाँकी नै छ ।

घटनाको अनुसन्धान अघि बढाइएको प्रहरीले बताएको छ । घटनाका कारण रेलवे सेवा पनि अवरुद्ध भएको थियो ।