महिलाको आरोपपछि हटाइए प्राइमार्कका सीइओ

लन्डन— फेशन क्षेत्रमा पछिल्लो समय निकै लोकप्रिय कम्पनी प्राइमार्कका प्रमुख कार्यकारी अधिकृत (सीइओ) पल मार्चेन्टले पदबाट राजिनामा दिएका छन् ।

कम्पनीमै कार्यरत एक महिलाले पलले सामाजिक वातावरणमा आफूमाथि गरेको व्यवहारबारे आरोप लगाएपछि मार्चेन्टले राजिनामा दिएको बीबीसीले सोमबार जनाएको छ ।

एक महिलाले मार्चेन्टको आचरणबारे आपत्ति जनाएपछि कानूनी विशेषज्ञहरूले अनुसन्धान गरेका थिए । अनुसन्धानपछि मार्चेन्टले गल्ती स्वीकार गरेको र उनमा कम्पनीको अपेक्षा भन्दा तल्लो स्तरको आचरण पाइएको प्राइमार्कको मुख्य कम्पनी एसोसिएटेड ब्रिटिश फुड्स (एबीएफ) ले बताएको छ।

मार्चेन्टले अनुसन्धानमा सहयोग गरेको र सम्बन्धित व्यक्तिलाई माफी मागेको पनि एबीएफले जनाएको छ। एसोसिएटेड ब्रिटिश फुड्सका सीइओ जर्ज वेस्टनले आफू यस घट्नाबाट अत्यन्त दुःखी र निराश रहेको बताउंदै सबैलाई सम्मान र मार्यादापूर्ण व्यवहार गर्नुपर्ने धारणा व्यक्त गरेका छन् ।

सन् २००९ देखि प्राइमार्कका सीइओ बनेका पल मार्चेन्टले प्राइमार्कलाई अन्तर्राष्ट्रिय रुपमा विस्तार गर्न सफल भएका थिए । आयरल्याण्डमा पेनिजको नामले चिनिने प्राइमार्कले सन् १९६९ मा डब्लिनमा पहिलो पसल खोलेपछि मार्चेन्टको नेतृत्वमा अन्तर्राष्ट्रिय विस्तार गर्न थालेको थियो ।

पल मार्चेन्ट

प्राइमार्कले फेसनेबल कपडा सस्तो मूल्यमा उपलब्ध गराउंदै आएको छ, जसले फेसनप्रति सचेत युवा ग्राहकहरूलाई आकर्षित गरेको छ । मार्चेन्टले प्राइमार्कमा आउनु अघि डेबेनहाम्स्, टपम्यान र न्यू लुक जस्ता रिटेल कम्पनीहरूमा काम गरेका थिए ।

प्राइमार्कले कोभिड १९ को प्रतिवन्धपछि मात्र २०२२ देखि अनलाइन बिक्री शुरु गरेको थियो, तर यसले डेलिभरी नगरी क्लिक–एन्ड–कलेक्ट सेवा मात्र सुरु गरेको थियो। अन्य सस्ता फेसन कम्पनीहरुले जस्तै प्राइमार्कले सस्तो र एकैपटक प्रयोग गरिने ‘युज एण्ड थ्रो’ जस्ता कपडा उत्पादन गरेको भन्दै आलोचना समेत खेप्दै आएको छ।

यद्यपि अहिलेको फेशनमा भने यसले सबैलाई आकर्षित गर्दै आएको छ ।

युरोप अमेरिकालगायत १७ मुलुकमा फैलिएको उक्त कम्पनीको ४ सय ६० स्टोरमा ८० हजार बढी कर्मचारीहरु कार्यरत छन् । मार्चन्टको राजिनामासंगै कम्पनीको शेयर मूल्यमा करिब ४ प्रतिशत ह्रास आएको छ ।