मन्त्रीस्तरीय गोलमेचमा लन्डन आएका वनमन्त्री सम्मेलनपछि दरबारमा

दूतावासमा नेपाली राजदूत चन्द्रकुमार घिमिरेका साथ मन्त्री ठकुरी

लन्डन । वन तथा वातावरणमन्त्री ऐनबहादुर शाही ठकुरीले जलवायुका असरबारे विश्व समुदायको ध्यानाकर्षण गराएका छन् ।

‘जल सुरक्षा, जलवायु, प्रकृति र विकासको अन्तरसम्बन्धमा हुने मन्त्रीस्तरीय गोलमेच’ कार्यक्रममा सहभागी हुन संयुक्त अधिराज्य बेलायतको लन्डन आएका मन्त्रीले जलवायुका असरबारे ध्यानाकर्षण गराएका हुन् ।

मन्त्री ठकुरी बेलायतको विदेश, राष्ट्रमण्डल र विकास कार्यालय (एफसिडिओ) द्वारा आयोजित मन्त्रीस्तरीय गोलमेच कार्यक्रममा सहभागी हुन बिहीबार लन्डन आएका हुन् ।

उनी बिहीबार साँझै बकिङ्घम दरबारमा राजा चार्लस तृतीयद्वारा आयोजित जल र जलवायु स्वागत समारोहमा सहभागी भएको बेलायतस्थित नेपाली दूतावासले जनाएको छ ।

यसअघि बिहीबार दिउँसो मन्त्री ठकुरीले मन्त्रीस्तरीय गोलमेच बैठकमा नेपालको जल सुरक्षाका दृष्टिकोणहरू प्रस्तुत गरेका थिए ।

उक्त कार्यक्रममा जलवायु परिवर्तन र जल असुरक्षाबाट प्रभावित विभिन्न देशका मन्त्री, जल सुरक्षा, जलवायु परिवर्तन र प्रकृतिका विज्ञ र विश्व बैँक, युएनइपी, युएनआइसिइएफ, आइएफएडी र ग्लोबल कमिसन अन द इकोनोमिक्स अफ वाटरलगायत अन्तर्राष्ट्रिय संस्थाका प्रतिनिधिको उपस्थिति थियो ।

मन्त्री ठकुरीले प्रणाली र जीविकोपार्जनमा जलवायु परिवर्तनले ल्याएका जीवन–मरणका चुनौतीको सामना गर्न नेपाल सरकारले लिएका पहलबारे प्रकाश पारेका थिए ।

सो अवसरमा उनले नेपालले आयोजना गर्न लागेको  ‘सगरमाथा संवाद’ बारे जानकारी गराएको मन्त्री ठकुरीको सचिवालयले जनाएको छ ।

संवादमार्फत नेपाल सरकारले बहुपक्षीय अन्तरक्रिया गर्न थालेको उल्लेख गर्दै मन्त्री ठकुरीले यो विश्वव्यापी संवाद ‘जलवायु परिवर्तन, हिमाल र मानवताको भविष्य’ विषयमा हुने बताए । उनले हिमालय क्षेत्रको जलवायु परिवर्तनका मुद्दाहरू सम्बोधन गर्न आवाज उठाउन र समर्थन जुटाउन नेपालको बलियो पहलबारेमा जोड दिएका थिए ।

कार्यक्रममा मन्त्री ठकुरीले परराष्ट्रमन्त्री डा. आरजु राणा देउवाकोतर्फबाट बेलायतको ‘एफसिडिओ’ का अन्तर्राष्ट्रिय विकास, ल्याटिन अमेरिका र क्यारिबियन मामिलाका राज्यमन्त्री बैरोनेस चापम्यानलाई संवादमा सहभागी हुन औपचारिक निमन्त्रणा पत्र हस्तान्तरण गरेका थिए ।

साथै बेलायतका प्रकृति विशेष प्रतिनिधि रुथ डेभिसलाई पनि सोही निमन्त्रणा दिए । सो अवसरमा बेलायतका लागि नेपाली राजदूत चन्द्रकुमार घिमिरेलगायत सहभागी थिए ।