मेक्सिको र क्यानडामाथि कर लगाउने ट्रम्पको घोषणा

अमेरिका, फागुन १३ गते । अमेरिकी राष्ट्रपति डोनाल्ड ट्रम्पले मेक्सिको र क्यानडामाथि कर लगाउने घोषणा गरेका छन् ।

मेक्सिको र क्यानडामा करका लागि आगामी समयसीमाबारे सोध्दा ट्रम्पले ह्वाइट हाउसमा फ्रान्सेली राष्ट्रपति इमानुएल म्याक्रोनसँगको संयुक्त पत्रकार सम्मेलनमा कर लगाउने कार्य अगाडि बढिरहेको बताए ।

अमेरिकासँग क्यानाडा र मेक्सिको मात्र नभई अन्य देशहरूले पनि नराम्रो व्यवहार गरेको र अमेरिकाबाट फाइदा उठाएको भन्दै उनीहरूमाथि पनि कर लगाउने चेतावनी ट्रम्पको थियो ।

ट्रम्पले अमेरिका सबैसँग पारस्परिक सम्बन्ध चाहने भन्दै अरूले शुल्क लगाए आफूहरू पनि शुल्क लगाउने बताए ।

फेब्रुअरी १ मा ट्रम्पले मेक्सिको र क्यानाडाबाट आयात हुने सामानहरूमा २५ प्रतिशत कर लगाउने कार्यकारी आदेशमा हस्ताक्षर गरेका थिए । विशेष गरी क्यानाडाली ऊर्जा उत्पादनहरूका लागि १० प्रतिशत कर वृद्धि गरिएको छ । फेब्रुअरी ३ मा ट्रम्पले मेक्सिको र क्यानाडाबाट आउने सामानहरूमा थप कर एक महिनाका लागि स्थगित गर्ने घोषणा गरेका थिए ।