रुकुमपूर्वमा दुई जनाको हत्यापछि आत्महत्या

रुकुमपूर्व- रुकुमपूर्व भूमे गाउँपालिका–४ मा एक व्यक्तिले दुई जनाको हत्यापछि आफूले पनि आत्महत्या गरेको खुलेको छ। मङ्गलबार दिउँसो ३ बजेको समयमा भूमे–४ काँडा साकिमका अन्दाजी ६० वर्षीया ढाटी बुढा र नाती आठ महिनाको समिर बुढाको शव फेला परेको थियो।

घटनास्थल पुगेर घटना अनुसन्धान गर्ने क्रममा हत्याका आरोपित सोही गाउँका ५१ वर्षीय चन्द्रसिङ पुनलाई खोजी गर्दा पुन पनि मृत फेला परेको जिल्ला प्रहरी कार्यालयका प्रमुख डीएसपी माधवराज खरेलले जानकारी दिए।

डिएसपी खरेलका अनुसार बज्यै र नातीको शव फेला परेपछि घटनाका आरोपित फरार रहेका पुन भूमे–४ कै खुलखुले खोलामा मृत फेला परेको डीएसपी खरेलले बताए ।

वडाध्यक्ष श्यामप्रसाद बुढाका अनुसार दुई जनाको शवलाई मुचुल्का बनाई शव उठाउने प्रक्रिया भइरहेको र हत्याका आरोपित पुनको शवलाई पनि मुचुल्का उठाउने प्रक्रिया भइरहेको छ। घटनाका आरोपित पुन हाम फालेर आत्महत्या गरेको हुनसक्ने प्रहरीले बताएको छ।

घटनाको अनुसन्धानपछि मात्र पूर्ण विवरण आउने जिल्ला प्रहरी कार्यालय रुकुमपूर्वका सूचना अधिकारी हिमबहादुर केसीले जानकारी दिए ।