लन्डनमा प्रवासी नेपाली मञ्च यूकेको २० औं वार्षिकोत्सव

लन्डन । प्रवासी नेपाली मञ्च यूकेको २० औं वार्षिकोत्सव यहाँ एक समारोहबीच मनाइएको छ । आइतबार बेलुका पश्चिम लन्डनमा आयोजित समारोहको शुरुमा संस्थाका संस्थापक अध्यक्ष स्वर्गीय आङ्ग कल्जंग लामाको आत्माको चिर शान्तिको कामना गर्दै एक मिनेट मौनधारण गरिएको थियो।

प्रवासी नेपाली मञ्च यूके अध्यक्ष तुङ्गभद्र भुसालको अध्यक्षतामा आयोजित कार्यक्रममा पूर्व अध्यक्षहरु दिनेश घिमिरे, रामशरण सिंखडा, राजेन्द्र पुडासैनी, सुरेन्द्र थपलिया लगायतले शुभकामना दिएका थिए।

एनआरएनएका केन्द्रीय उपाध्यक्ष तथा संस्थाका पूर्व अध्यक्ष सिम्खडाले २०१४ जनवरी ५ मा आफू मञ्चको अध्यक्षमा निर्वाचित भएको स्मरण गर्दै अझ जुझारु रुपमा अगाडि  बढ्न संस्थालाई शुभकामना दिए। अर्का पूर्व अध्यक्ष पुडासैनीले वार्षिकोत्सवमा सहभागी हुन आएका सबैलाई धन्यवाद दिए ।

अर्का पूर्व अध्यक्ष सुरेन्द्र थपलियाले सन् २००४ डिसेम्बर २० का दिन आङ्ग कल्जंग लामाको निवासमा भेला भएर आफूहरुले संस्था स्थापना गरेको स्मरण गरे। उनले नेपालको उन्नति-प्रगति र नेपालीको सुःखदुःखमा साथ दिनुका साथै मञ्चले सामाजिक र परोपकारी कामहरु गर्दै आएको जनाए। उनले श्रमिक राहत कोष खडा गर्न संस्थाले छिट्टै आकर्षक उपहार सहितको राफल टिकट बिक्री अभियान संचालन गर्न लागेको जनाए।

त्यस्तै प्रवासी नेपाली मञ्च यूके इन्चार्ज सरस्वती केसी, प्रवासी नेपाली मञ्चका पूर्व अध्यक्ष तथा अन्तरराष्ट्रिय कमिटीका उपसचिव कर्ण शाही, ओएनएफ यूके नर्थ वेष्ट कमिटीका अध्यक्ष भिमलाल भट्टराई लगायतले पनि शुभकामना दिए।

‘लोकतन्त्र तथा मानव अधिकारको रक्षा गर्न एनडीएफ’

२० औं वार्षिकोत्सव समारोहलाई सम्बोधन गर्दै कार्यक्रमका प्रमुख अतिथि तथा प्रवासी नेपाली मञ्च अन्तरराष्ट्रिय कमिटीका अध्यक्ष भक्त गुरुङले सन् २००४ मा तत्कालिन राजा ज्ञानेन्द्रले लोकतन्त्र अपहरण गरेको बेला लोकतन्त्र तथा मानव अधिकारको रक्षा गर्न एनडीएफ स्थापना गरिएको बताए।

उनले नेपाललाई समृद्ध बनाउन, यहाँ आर्जन गरेको ज्ञान र धनलाई नेपालसंग जोड्न र समृद्ध नेपाल बनाउन संस्थाले काम गर्नुपर्नेमा जोड दिए।

उनले डायस्पोरासंग नजोडिंदासम्म नेपालको विकास सम्भव छैन भन्दै भारत लगायत संसारभरि रहेका डायस्पोरालाई समृद्ध नेपाल बनाउन परिचालित गर्नुपर्ने जनाए। गुरुङले प्रवासी नेपाली मञ्चलाई बढी भन्दा बढी नेपालीसम्म पुर्‍याउन आग्रह पनि गरे।

शुभकामना मन्तव्य दिंदै राष्ट्रिय स्वतन्त्र पार्टी यूकेका अध्यक्ष पवन शर्माले विदेशमा बसेर पनि देशको हितमा केही भए पनि योगदान गर्ने उद्देश्यले नेपालीहरु विभिन्न संगठनमा आबद्ध भएको बताए। उनले राष्ट्रिय स्वतन्त्र पार्टी एक वैकल्पिक पार्टीको रुपमा स्थापित भै सकेको बताउंदै जुनसुकै पार्टीमा भए पनि सुसंस्कृत विचार राख्न आग्रह गरे।

प्रवासी नेपाली मञ्च यूकेका अध्यक्ष तुङ्गभद्र भुसालले कोभिड महामारीको समयमा मन्चले अन्तरराष्ट्रिय कमिटीसंग मिलेर पोखराको एक अस्पतालमा अक्सिजन प्लान्ट स्थापना गर्नुका साथै थुप्रै अक्सिजन कन्सनट्रेटरहरु नेपाल पठाएको स्मरण गरे । उनले सन् २०१५ को महाभूकम्प लगायत विपदको बेलामा सक्दो सहयोग गर्दै आएको जनाए।

उनले मञ्च नेकपा एमालेसंग निकट रहेको बताउंदै एमालेका राम्रा कामहरुको प्रचार प्रसार गर्नुका साथै कमी कमजोरी सच्याउन आफूहरुले रचनात्मक सुझाव पनि दिने गरेको बताए।

कार्यक्रममा सपन राई तथा श्याम खत्रीले विभिन्न गीत प्रस्तुत गरेका थिए। त्यस्तै सीमा अधिकारी, अनीशा लगायतले रोचक नृत्य प्रस्तुत गरे।

प्रवासी नेपाली मञ्च यूकेका सचिव पूण्य रेग्मीले संचालन गरेको समारोहमा कार्यक्रम संयोजक कृष्ण भण्डारीले स्वागत मन्तव्य व्यक्त गरेका थिए भने उपाध्यक्ष डा. मुकुन्द बास्तोलाले ‘हेल्थ एण्ड सेफ्टी’ बारे जानकारी गराएका थिए ।

वार्षिकोत्सवमा बेलायतमा बसोबास गर्ने एमालेसँग निकटता राख्ने पुराना तथा नयाँ सदस्यहरुको उपस्थिति थियो ।