बेलायतको सिजनल भिसा खुलाउन वैदेशिक रोजगार व्यवसायीको माग

काठमाडौं–बेलायतमा नेपालबाट मौसमी कामदार (सिजनल भिसा) मा नेपाली श्रमिक पठाउन लगाइएको रोक खुलाउन सरकारले पहल गरिदिन वैदेशिक रोजगार व्यवसायीले माग गरेका छन् ।

गोफण्ड इन्टरनेसनल लिमिटेडले काठमाडौंमा गरेको एक कार्यक्रममा उनीहरुले सन् २०२३ पछि यूकेले नेपालबाट कृषि क्षेत्रमा सिजनल भिसामा श्रमिक लैजान लगाएको रोक खुलाउन सरकारी तहबाट प्रयास गर्नुपर्ने बताए ।

गोफण्ड इन्टरनेसनल लिमिटेडका सल्लाहकार क्रिस रोबकले रोक लगाउँदा नेपाली श्रमिकले अवसर गुमाइरहेको बताए । ‘यूकेको कृषिमा आप्रवासी श्रमिकको माग धेरै छ । तर नेपाल त्यो अवसरबाट वञ्चित छ’- उनले भने । 

उनका अनुसार यूकेले वार्षिक ४५ हजार बराबरको आप्रवासी श्रमिक भित्राइरहेको छ । तर सिजनल भिसामा नेपाली श्रमिक लैजान बन्द गरेकाले यो अवसर नेपालले गुमाउनु परेको छ । 

नेपालबाट सिजनल भिसामा श्रमिक पठाउंदा म्यानपावार कम्पनीबाट श्रमिक ठगिएको, भिसा सकिएपछि गैरकानुनी बसाइजस्ता कारण देखाएर यूकेले नेपालबाट सन् २०२३ बाट श्रमिक लैजान बन्द गरेको थियो । सन् २०२२ मा ३ हजार ६०० श्रमिक सिजनल भिसामा यूके गएका थिए । तर त्यसपछि यूकेले श्रमिक लैजान मानेको छैन ।

अब भने यूकेले श्रमिक लैजान लगाएको रोक खुलाउन नेपाल सरकारले प्रयास थाल्नुपर्ने रोबकले बताए । ‘सन् २०२९ सम्म यूकेले यही भिसामा श्रमिक लैजानेछ’ उनले भने, ‘अहिलेकै अवस्था रह्यो भने नेपालीले श्रमिकले यो अवसर पाउने छैनन् । नेपाल सरकारले श्रमिक पठाउने कुरामा पहल थाल्नुपर्छ ।’

कार्यक्रममा सहभागी व्यवसायीले नेपाल सरकारले यूके सरकारसँग श्रमिक पठाउने विषयमा प्रयास नगर्दा नेपाली श्रमिकले अवसर गुमाइरहेको धारणा राखेका थिए ।