प्रधानमन्त्री ओलीले मोदीलाई दिए नेपाल भ्रमणको निम्तो

काठमाडौं, साउन २७ गते । प्रधानमन्त्री केपी शर्मा ओलीले भारतीय समकक्षी नरेन्द्र मोदीलाई नेपाल भ्रमणको निमन्त्रणा दिएका छन् ।

शिष्टाचार भेटका लागि आइतबार दुई दिने नेपाल भ्रमणमा आएका भारतीय विदेश मन्त्रालयका सचिव विक्रम मिस्रीमार्फत प्रधानमन्त्री ओलीले समकक्षी मोदीलाई नेपाल भ्रमणको निमन्त्रणा दिएका प्रधानमन्त्रीको निजी सचिवालयले जानकारी दिएको छ । ।

सचिव मिस्रीले आइतबार प्रधानमन्त्री ओलीसंग सिंहदरबारमा शिष्टाचार भेटवार्ता गरेका थिए ।

भेटका अवसरमा दुई पक्षीय र मित्रवत सम्बन्धलाई अझै सुदृढ बनाउने बारेमा छलफल भएको जनाइएको छ । भेटमा परराष्ट्र मन्त्रालयका सचिव सेवा लम्साललगायत सहभागी थिए ।

मिश्रीले राष्ट्रपति रामचन्द्र पौडेल, शीतल निवासमा, नेपाली कांग्रेसका सभापति एवं पूर्वप्रधानमन्त्री शेरबहादुर देउवालाई उनको निवास बुढानिलकण्ठमा र नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’सँग निजी निवास खुमलटार पुगेर भेटवार्ता गरेका छन् ।

भेटवार्तामा उनीहरुबीच द्विपक्षीय आपसी हितका विविध विषयमा छलफल भएको तथा नेपाल–भारत सम्बन्ध र पारस्परिक हितकारी सहयोगलाई अगाडि बढाउने तथा थप सुदृढीकरण गर्ने विषयमा छलफल भएको जनाइएको छ ।