नेपाललाई हराउँदै भारतले जित्यो काभा महिला भलिबल उपाधि

काठमाडौं- काठमाडौँमा सम्पन्न काभा वुमन्स नेसन्स लिगको उपाधि भारतले जितेको छ ।

मंगलबार दशरथ रंगशाला कभर्ड हलमा खेलिएको फाइनलमा नेपाललाई हराउँदै भारत च्याम्पियन बनेको हो ।

उपाधि जित्ने क्रममा प्रतिस्पर्धात्मक फाइनल खेललाई भारतले ३–२ को सेटमा आफ्नो पक्षमा पारेको हो ।

पहिलो सेटमा रोमाञ्चक जीत हात पारेको नेपाललाई दोस्रो सेट जितेर भारतले बराबरी गरेको थियो । नेपालले तेस्रो सेट जितेर पुनरागमन गरेपनि पछिल्लो २ सेट लगातार जित्दै भारतले उपाधि जित्यो ।

पहिलो सेटमा २५–२३ ले जित निकालेको नेपालले दोस्रो सेट १४–२५ ले गुमाएको थियो । तेस्रो सेटमा २५–२२ ले जित हासिल गरेपनि नेपाल चौथो सेटमा भारतसंग २५–२१ ले पराजित भयो । पाचौं सेटमा भारतले १५–५ को जीतसहित उपाधि कब्जा गर्यो ।

समूह चरणमा पहिलोपटक भारतमाथि ऐतिहासिक जीत हासिल गरेको उत्साहित नेपाल फाइनलमा भने भारतसंग स्तब्ध हुन पुगेको छ ।