बेलायतमा हराइरहेका नेपालीमूलका विद्यार्थी मृत भेटिए
![](https://www.nepalilink.com/wp-content/uploads/2024/02/horizontal.gif)
![](https://www.nepalilink.com/wp-content/uploads/2020/04/anugraha_810.gif)
लन्डन । लन्डनमा अध्ययनरत नेपालीमूलका एक विद्यार्थी मृत भेटिएका छन् ।
युनिभर्सिटी अफ वेष्ट लन्डनमा ब्याचलर्स अध्ययनरत २० वर्षीय सुजल बराल ससेक्सस्थित बिचीहेड समुद्रछेउको क्लीफ (भीर) बाट तल करिब ५ सय मिटर खोचमा मृत भेटिएको जानकारी आएको उनको खोजीमा सक्रिय यती नेपाली एसोसिएसन यूके महासचिव टंक भट्टराईले जनाए ।
प्रहरीको अनुसन्धानपछि घट्नाको पूर्ण विवरण थाहा हुने भट्टराईले बताए ।
उनका बुवा देव बराल र आमा बबिता भारतको पन्जावमा बसोवास गर्छन् । सुजल भारतमा जन्मिएका हुन् तर बांकी परिवार नेपाल पूर्वमा छन् ।
भट्टराईले नेपाली लिंकलाई बताए अनुसार, ससेक्सबाट एक व्यक्तिले सामाजिक सञ्जालमा नम्बर पाएर बुधबार उनका मामाका छोरा आलोक लुईंटेललाई कल गरेका थिए ।
कल आएपछि ससेक्स पुलिस र इण्डियन हाइ कमिसनसंग कुरा हुंदा ति निकायले मृत भेटिएको व्यक्ति सुजल भएको जानकारी दिए ।
ससेक्स पुलिस र इण्डियन हाइ कमिसनसंग समन्वय गरेपछि आलोक र यती सदस्य जेनिस गिरीले आज अस्पताल गएर सुजलको मृत शरीर पहिचान गरेका थिए ।
स्वर्गीय बराललाई रोजगारी समेत दिएका टंक भट्टराईले उनको शव आमा बाबुको चाहना बमोजिम भारतमै पठाउन इण्डियन हाइ कमिसनसंग समन्वय भइरहेको बताए ।
सुजल इंग्ल्याण्डको नर्थफ्लिटदेखि नर्थहोल्ट लन्डन कोठा आउने क्रममा गत २१ जुलाई अपरान्ह करिब ५ बजेदेखि सम्पर्कविहीन भएका थिए ।
सुजलले करिब ५ बजे आमासंग कुराकानी पनि गरेका थिए । राती १२ बजे वाट्सएपमा अनलाइन देखिएका उनी त्यसयता बेपत्ता थिए ।
करिब ५ फिट २ इन्च उचाईंका उनी खैरो हुडी, टोपी र जिन्स पहिरनमा थिए । सुजलको खोजीका लागि आफन्तजन र सामाजिक सञ्जालभर व्यापक अपिल गरिएको थियो ।