‘यूके बस्ने माया’ तिर विनय अधिकारी

लन्डन–व्यवसायी तथा एनआरएनए अभियन्ता विनय अधिकारीको दोश्रो गीत ‘यूके बस्ने माया’ बुधबार सार्वजनिक हुने भएको छ । उनको आफ्नै युट्युब च्यानल ‘विनय अधिकारी’ मार्फत गीत सार्वजनिक गर्न लागिएको हो ।

गीतमा अधिकारीको शब्द र बद्री सापकोटाको 
संगीत छ भने शान्तिश्री परियार र बद्री सापकोटाको स्वर छ ।

विक्रम चौहानले निर्देशन गरेको म्यूजिक भिडियोमा विनय अधिकारी र जुनु गुरुङले अभिनय गरेका छन् ।

अधिकारीको यो दोश्रो गीत हो । यसअघि उनले ‘दुनियाँ लठ्ठै छ’ बोलको गीत दर्शकश्रोतामाझ ल्याएका थिए । उक्त गीत अहिलेसम्म झण्डै ६ लाख दर्शकले हेरेका छन् । पहिलो गीतको म्यूजिक भिडियो सफल भएपछि अधिकारीले दोश्रो गीत आफ्नै शब्दमा तयार पारी बजारमा ल्याउन लागेका हुन् ।

समाजसेवी अधिकारी अचेल गीतसंगीतसहित चलचित्र निर्माणतिर पनि लागेका छन् । अधिकारीले बालगायक अशोक दर्जीको जीवन र सांगीतिक करिअरको उतारचढावमा आधारित फिल्म ‘मनबिनाको धन ठूलो कि धनबिनाको मन’ बनाउने घोषणा गरिसकेका छन् ।