बेलायतको काउन्सिलर निर्वाचित भए पूर्व गोर्खा सारुमगर

लन्डन- भूतपूर्व गोर्खा भीम सारुमगर बेलायतको काउन्सिलर निर्वाचित भएका छन्।

विहीबार सम्पन्न यहाँको स्थानीय निर्वाचनमा वार्विकशायरको ननिटन् एन्ड बेडवर्थ बरोको सेन्ट मेरिज् वडाको काउन्सिलरमा उनी विजयी भएका हुन् ।  

वडाको दुई काउन्सिलरका लागि भएको निर्वाचनमा लेबर पार्टीबाट उम्मेद्वार सारु सर्वाधिक ८ सय ९ मत प्राप्त गर्दै विजयी बने ।

पाल्पा घर भएका पूर्व गोर्खा सारु बेलायतको नेपाली समुदायमा पनि सक्रिय रहंदै आएका सामाजिक अभियन्ता हुन्। 

उनी पूर्व गोर्खाहरुको संस्था ब्रिटिश गोर्खा भेट्रान एशोसिएसन यूकेमा अध्यक्ष छन्।