लुम्बिनी प्रवर्धनका लागि एनआरएनए र चार पालिकाबीच समझदारीपत्रमा हस्ताक्षर

काठमाडौं । गैरआवासीय नेपाली संघ (एनआरएनए) र  लुम्बिनी सांस्कृतिक नगरपालिका, कपिलवस्तु नगरपालिका, रामग्राम नगरपालिका तथा देवदह नगरपालिकाको संयुक्त साझेदारीमा लुम्बिनी क्षेत्रको पर्यटन प्रवर्धन तथा विकासका लागि समझदारी पत्रमा हस्ताक्षर भएको छ ।  

काठमाण्डौस्थित संघको सचिवालयमा बुधवार आयोजित विशेष कार्यक्रममा संघ र नगरपालिकाहरुबीच समझदारीपत्रमा हस्ताक्षर भएको हो ।

उक्त समझदारीपत्रमा संघका तर्फबाट अध्यक्ष डा बद्री केसी, लुम्बिनी सांस्कृतिक नगरपालिकाका प्रमुख सजरुद्दिन मुसलमान, कपिलवस्तु नगरपालिकाका प्रमुख धनपत यादव, रामग्राम नगरपालिकाका प्रमुख सुदी पौडेल तथा देवदह नगरपालिकाका प्रमुख ध्रुवप्रसाद खरेलले हस्ताक्षर गरेका छन् ।

विश्व शान्तिका अग्रदूत भगवान गौतम बुद्धको जन्मस्थल विश्व सम्पदा सूचीमा सूचीकृत रुपन्देहीस्थित लुम्बिनी सांस्कृतिक नगरपालिका, बुद्धले सिद्धार्थ गौतमको रुपमा यौवनकाल बिताएको (आफ्नो जीवनको झण्डै २९ वर्ष) कपिलवस्तुको तिलौराकोटस्थित कपिलवस्तु नगरपालिका तिलौराकोट, बुद्धको मामाघर रुपन्देहीको देवदह नगरपालिका र नवलपरासीस्थित बुद्धको अष्टधातु रहेको रामग्राम नगरपालिकाको पर्यटकीय प्रवर्धन र विकास समझदारीको मुख्य उद्देश्य छ ।

समझदारी अनुरुप अन्तर्राष्ट्रियस्तरमा शान्ति, सद्भावको प्रवर्धन गर्न, नेपालको पर्यटन प्रवर्धनमा टेवा पुरयाउन एनआरएनए र स्थानीय सरकारहरूबीचको सहकार्यलाई सुदृढ बनाई बुद्ध धर्मको उद्गम भूमि लुम्बिनीले बोकेको परम्परागत संस्कृति र शान्तिको दर्शन अन्तर्राष्ट्रिय स्तरमा पुरयाइ बलियो बनाउने संयुक्त प्रयासको रुपमा यस समझदारीलाई लिइएको छ ।

साथै, यसले बुद्ध धर्मको भावनामार्फत नेपाल र विश्वभर शान्ति र भाइचाराको सिद्धान्त सञ्चार गर्न पनि मद्दत गर्ने विश्वास लिइएको छ ।

कार्यक्रममा संघका अध्यक्ष डा बद्री केसीले विश्व शान्तिका अग्रदूत भगवान गौतम बुद्धको जन्मस्थल, शान्तिभूमि धार्मिक एवं पर्यटकीय क्षेत्र बुद्ध परिपथका चार नगरपालिका र गैरआवासीय नेपाली संघबीच संस्थागत रुपमा नै सम्बन्ध कायम भएको भन्दै खुशी व्यक्त गरे । 

उनले लुम्बिनीलाई अन्तर्राष्ट्रियस्तरमा थप परिचित गराउन एनआरएनएले स्थानीय सरकारसँग मिलेर काम गर्न लागेको बताए । केसीले भने- ‘संसारको जुनसुकै कुनामा जाँदापनि हामी बुद्ध जन्मेको देशका हौँ भन्दा जति गर्विलो महसुस हुन्छ भनेरमात्र अब पुग्दैन, वास्तवमै गर्व महसुस गर्न अब हामीले अन्तर्राष्ट्रियस्तरमा बुद्धको जन्मभूमि लुम्बिनीको प्रचार गरी बढी भन्दा बढी पर्यटक भित्र्याउन हाम्रो भूमिका अहम् हुनुपर्छ ।’ 

लुम्बिनीको विकासका लागि संसारभरका बौद्ध धर्मावलम्बीहरु एकजुट हुने उनको भनाई थियो । आफूहरुले केन्द्र सरकारसँग थुप्रै काम गरेको र अझै कतिपय काम पाइपलाइनमै रहेको भन्दै अध्यक्ष डा केसीले स्थानीय सरकारसँग मिलेर एनआरएनएले अझ धेरै काम गर्नसक्ने विश्वास व्यक्त गरे ।

हरेक गैरआवासीय नेपाली पर्यटकीय सद्भावनादूत भएको भन्दै अध्यक्ष डा केसीले थपे, ‘हाम्रा ८७ वटा राष्ट्रिय समन्वय परिषद (एनसीसी) छन्, म सरकारसँग आग्रह गर्छु ती ८७ वटै एनसीसीका अध्यक्षलाई सरकारले पर्यटकीय सद्भावनादूत बनाओस् ताकी नेपालको पर्यटन प्रवर्धनमा हर एक गैरआवासीय नेपाली सहभागी बन्न सकोस् ।’

कार्यक्रममा देवदह नगरपालिकाका प्रमुख ध्रुव्र प्रसाद खरेलले लुम्बिनी प्रदेशमा ४ वटा ऐतिहासिक स्थानलाई विश्व बजारमा चिनाउन एनआरएनएले गरेको पहलको प्रशंसा गरे । उनले भने, तपाईंहरुमार्फत बुद्ध परिपथभित्रका ऐतिहासिक भूमिलाई विश्वमाझ चिनाउन थप हौसला मिलेको छ, खुसी लागेको छ, यसका लागि तपाईंहरुलाई धन्यवाद ।’

यस्तै कपिलवस्तु नगरपालिकामा प्रमुख सुदीप पौडेलले लुम्बिनी क्षेत्रको विकासका लागि एनआरएनएले सुरु गरेको नयाँ आयामले मूर्तरुप लिने विश्वास व्यक्त गरे । उनले भने ‘हामीलाई गर्व लागेको छ कि विभिन्न कारणले विश्वका विभिन्न स्थानमा पुगेका नेपालीहरुले मातृभूमिलाई चिनाउन हरसम्भव प्रयास गरिरहेका छन्, हामीसँग काँधमा काँध मिलाएर हाम्रा सपना पूरा गर्ने अवसर जुराएकोमा हामी आभारी छौँ ।’

यस्तै लुम्बिनी सांस्कृतिक नगरपालिकाका प्रमुख सजरुद्दिन मुसलमानको भनाई सम्प्रेषण गर्दै प्रशासकीय प्रमुख कृष्ण सापकोटाले लुम्बिनीको पर्यटन प्रवर्धनका लागि भएको समझदारीले समग्र लुम्बिनी प्रदेशको विकासमा पनि सहयोग गर्ने विश्वास व्यक्त गरे । 

एनआरएनए र चार पालिकाबीचको सहकार्यले विश्वस्तरमा बौद्ध भूमिसहित पर्यटकीय क्षेत्रको प्रचार र अन्य प्रचुर सम्भावनालाई पनि उजागर गर्ने र चार पालिकामा रहेका पर्यटकीय एवम् धार्मिक स्थलको  प्रचारप्रसार, पर्यटन प्रवर्द्धन र पालिकाको विकासका लागि असल अभ्यास, अनुभव अदानप्रदान र पर्यटन एवं संस्कृतिको प्रवर्द्धन, कृषि, शिक्षा, स्वास्थ्य, वातावरण सरंक्षण तथा खेलकुद लगायत क्षेत्रको विकासमा सहकार्य हुने उनको भनाई थियो ।

यस्तै, रामग्राम नगरपालिकाका प्रमुख धनपत यादवले एनआरएनएसँगको सहकार्यले लुम्बिनी विकासको सपना पूरा गर्ने र पर्यटकीय प्रचारप्रसारमा सघाउ पुग्ने आशा राखेको बताए । नेपालको प्रचारप्रसारमा ८७ वटा देशका गैरआवासीय नेपालले पर्यटकीय दूत बनेर सहयोग गर्न उनले आह्वान पनि गरे । 

कार्यक्रममा संस्कृति पर्यटन तथा नागरिक उड्ययन मन्त्रालयका उपसचिव सरोज कुमार पोखरेलले गैरआवासीय नेपालीहरु नै विदेशमा नेपाल चिनाउने सच्चा दूत भएको भन्दै नेपालको पर्यटकीय विकास र प्रवर्धनका लागि सरकार सहकार्य गर्दै अघि बढिरहेको र अबका दिनमा पनि यसलाई थप व्यवस्थित रुपमा अघि बढाउने प्रतिवद्धता व्यक्त गरे । 

उनले पर्यटनको माध्यमबाट नेपालको विकास र समृद्धिमा सघाउ पुरयाउन गैरआवासीय नेपालीको भूमिका महत्वपूर्ण हुने विश्वास पनि व्यक्त गरे । विश्वका विभिन्न ३१ वटा शहरमा पर्यटन दूत नियक्त गरेको भन्दै आगामी दिनमा एनआरएन, केन्द्र र स्थानीय सरकार मिलेर काम गर्न सके फलदायी हुने उनको भनाई थियो । 

यसअघि कार्यक्रममा संघका उपसचिव तथा पर्यटन प्रवर्धन कमिटीका संयोजक सोम सापकोटाले स्वागत मन्तव्य राख्दै बुद्ध परिपथको महान अभियान पूरा गर्न एनआरएनएले महत्वपूर्ण भूमिका निर्वाह गर्ने बताए । 

संघले स्थापनाकालदेखि नै नेपाललाई विश्व बजारमा चिनाउन आफ्नो स्थानबाट काम गर्दै आएको स्मरण गराउँदै उनले स्थानीय तहसँग संस्थागत रुपमै मिलेर काम गर्न समझदारी गरिएको उल्लेख गरे ।

उनले भने, ‘विदेशमा बसेर हामीले हाम्रो पर्यटकीय क्षेत्रको विकास, प्रचारप्रसारका लागि महत्वपूर्ण पूलको काम गरिरहेका छौँ र अब यसलाई संगठित रुपमा अघि बढाउन यस समझदारीले अहम् भूमिका खेल्ने विश्वास छ । हामी बुद्ध, बुद्धत्व र नेपाललाई विश्वमा पुरयाउन हामी प्रतिवद्ध छौँ ।’

कार्यक्रममा संस्कृति पर्यटन तथा नागरिक उड्डयन मन्त्रालयका सचिव डा. दीपक काफ्ले, कोशी प्रदेश सांसद मिना श्रेष्ठ, देवदह नगरपालिकाका उपप्रमुख विद्यालक्ष्मी गुरुङ, लुम्बिनी सांस्कृतिक नगरपालिकाका रामप्रसाद ज्ञवाली, लेखा अधिकृत रामचन्द्र अर्याल, गैरआवासीय नेपाली संघका सल्लाहकार टीबी कार्की लगायतको उपस्थिति थियो ।
उक्त कार्यक्रम सञ्चालन संघका प्रमुख कार्यकारी प्रमुख राजेन्द्र कुमार राउतले गरेका थिए ।