बेलायतमा १ लाख पाउन्ड उठाउने लक्ष्यसहित आनीको कन्सर्ट हुँदै, सहयोग मानवसेवा आश्रमलाई

लन्डन- लोकप्रिय समाजसेवी गायिका आनी छोइङ डोल्मा सांगीतिक कन्सर्टका लागि बेलायत आउने भएकी छन्। 

गायिका छोइङले मानवसेवा आश्रम सहयोगार्थ आगामी मे ५ मा बेलायतमा आयोजना हुने कन्सर्टमा प्रस्तुति गर्ने भएकी हुन्।

मानवसेवा आश्रम बेलायत शाखाको आयोजनामा क्याम्बर्लीको लेकसाइड कन्ट्री क्लबमा ‘इनर मेलोडी फर इनर पिस’ कार्यक्रम हुने भएको हो। 

कार्यक्रममा १५ सय जनाको सहभागिता गराउने र मानव सेवा आश्रमका लागि १ लाख पाउन्ड बढी सहयोग जुटाउने लक्ष्य राखिएको आयोजक मानवसेवा आश्रम बेलायतका अध्यक्ष सुनिलबाबु खड्काले नेपालीलिंकलाई बताए।  

करिब ८ वर्षअघि बेलायतको रेडिङमा आनीको कन्सर्ट उल्लेख्य सहभागितामा सम्पन्न भएको थियो।

गायिका आनी छोइङ डोल्मा

यसैबीच, आयोजक मानवसेवा आश्रम बेलायत शाखाको कार्यक्रम तयारीसम्बन्धि पहिलो बैठक सोमबार सम्पन्न भएको छ।  

अध्यक्ष सुनिलबाबु खड्काको अध्यक्षतामा सम्पन्न बैठकमा कार्यसमितिका पदाधिकारी एवम् सल्लाहकारहरुबीच तयारी, कार्यविभाजनलगायत विषयमा छलफल गरिएको थियो।  

मानवसेवा आश्रमका काममा सहयोग गर्ने उद्देश्यसहित गत वर्ष एनआरएनए यूके निवर्तमान अध्यक्ष खड्काको अध्यक्षतामा मानवसेवा आश्रम यूके शाखा गठन गरिएको थियो। 

गत वर्ष आश्रम अध्यक्ष रामजी अधिकारीसहितको टोली बेलायत आउंदा पनि करिब एक  करोड रुपैयाँ बढीको सहयोग जुटाइएको अध्यक्ष खड्काले जानकारी दिए।  

मानवसेवा आश्रमले विसं. २०८२ भित्र नेपालमा कसैले पनि बाध्यात्मकरुपमा खुलाअकाशमुनि, सडकपेटी एवम् सार्वजनिक स्थलहरुमा कष्टपूर्ण जीवन बिताउनु नपर्ने अवस्था बनाउने लक्ष्यसहित देशव्यापी अभियान चलाइरहेको छ । 

संस्थाले हाल सातै प्रदेशका १९ जिल्लामा २४ सेवाकेन्द्र सञ्चालन गरी ७७ वटै जिल्लाका सहयोगापेक्षी सडकआश्रित मानवहरुको उद्धार गर्दै आएको छ।