लण्डनबाट गोरखा च्यानलको प्रसारण पुन: शुरु

लण्डन । बेलायतबाट गोरखा च्यानलको प्रसारण पुन: शुरु भएको छ ।

गोरखा च्यानल प्रालिका तर्फबाट युट्यूब च्यानल शुरु गरिएको प्रबन्ध निर्देशक विमला सेनेले जानकारी दिइन् ।

सो च्यानलबाट अहिले पाक्षिक रुपमा ‘स्पेशल टक’ र ‘माइ भ्वाइस’ (मेरो आवाज) गरी दुई वटा कार्यक्रम प्रसारण गरिने छ ।

‘स्पेशल टक’को पहिलो अंकमा सोलिसिटर उत्तरमान तिगेलासित बेलायतको नयाँ आप्रवासन नीति र त्यसले नेपालीहरुलाई पार्ने प्रभावका बारेमा वार्ता गरिएको छ ।

महिला अतिथिसित कुराकानी गरिने ‘माइ भ्वाइस’ को पहिलो अंक छिट्टै प्रसारण गरिने बताएको छ ।

यता गोरखा च्यानल डट कम नामक वेवसाइट पनि शुरु गरिएको सेनेले जनाइन् । पुरानो वेवसाइट परिमार्जन गरी समाचारमूलक वेवसाइट बनाउने कोसिस गरिएको पनि सेनेले जानकारी दिइन् ।

गोरखा च्यानल बेलायतबाट केही वर्षअघिसम्म विभिन्न कार्यक्रमका साथ सञ्चालनमा थियो । तर केही समययता भने प्रसारण अवरुद्ध भएको थियो ।