एनआरएनए यूकेले पश्चिम नेपालका भूकम्पपीडितलाई गर्‍यो झन्डै १० लाख सहयोग

नेपाली लिङ्क जनवरी ४, २०२४

लन्डन । एनआरएनए यूकेले पश्चिम नेपालका भूकम्पपीडितलाई करिब १० लाख रुपैयां सहयोग गरेको छ ।

एनआरएनए यूकेले आफ्नो कार्यसमिति र अन्य चन्दादाताबाट संकलित ५ हजार ८२८ पाउण्ड, ४७ पेन्स बराबरको रकम भूकम्पपीडितलाई प्रदान गरेको हो ।

आज बिहीबार एनआरएनए पूर्व अध्यक्ष तथा प्रमुख संरक्षक डा. शेष घलेको एमआइटी ग्रुप फाउण्डेशन र ग्लोबल एनआरएन फाउण्डेशनमार्फत पीडितलाई दिइएको अध्यक्ष प्रेम गाहामगरले जनाए ।

गत ३ नोभेम्बर २०२३ राती गएको ६.४ रेक्टर स्केलको भूकम्पले जाजरकोट र पश्चिम रुकुम लगायत क्षेत्रमा ठूलो धनजनको क्षति भएपछि एनआरएनए यूकेले तत्काल भूकम्प पीडितहरुका लागि व्यक्तिगत तथा संस्थागत रुपमा चन्दा आव्हान गरेको थियो ।

बेलायतवासी संघसस्था तथा नेपालीले दिल खोलेर सहयोग गरेको जनाउंदै अध्यक्ष गाहामगरले दाताहरुप्रति आभार व्यक्त गरेका छन् । उनले प्राकृतिक विपत्तिको मार खेपिरहेका कर्णालीवासीलाई गाँस, बास र कपासको जोहो गराउन चन्दादाताबाट प्राप्त सहयोग महत्वपूर्ण र प्रशंसायोग्य रहेको पनि बताए ।

गाहामगरले डा. घले जस्तो विश्वसनीय र उदार मन भएका व्यक्तित्वको सहकार्यमा पीडितलाई सहयोग गर्न पाउनु आफ्ना लागि गौरवको विषय भएको जनाउंदै संकलित रकममा एक पेनी पनि तल माथि नगरि सदुपयोग हुने विश्वास दिलाए । चन्दा संकलनको संयोजन उपाध्यक्ष तीर्थ बहादुर मल्ल (अनिल) ले गरेका थिए ।

उता, एमआइटी ग्रुप फाउण्डेशनले रु. ५० लाख र ग्लोबल एनआरएन फाउण्डेशनले रु. ५० लाख प्रदान गरेका छन् ।